DILI, STLTIMORLESTE.com – Mate isin Pe. Anibal da Costa Miranda, ohin too Dili no sei Hatoba iha Igreja Se Katedral Dili, no sei iha programa misa husi parokia no reza husi grupu sira.
Tuir orariu neebe STL asesu husi media sosial Arkedioseze Metropolitana Dili, Tersa nee (07/04/2026) hatete, iha Tersa (07/04/2026) iha tuku 08:00 OTL lori mate isin bá vizita ikus iha nia uma Same (Kami Laran) no 09:00 sei tranlada mate isin husi Same bá Dili, no oras 14:00 liu tama iha Igreja Se Katedral Dili, sei hatoba iha neeba no sei iha programa misa husi parokia ka grupu sira.
Tuir fali iha loron Kuarta (08/04/2026) misa funebre. Iha 09:00 misa iha Se Katedral Dili, misa sei prezide husi Dom Virgilio Cardeal do Carmo da Silva. Depois de misa bá halot Reverendo Saserdote Anibal da Costa Miranda Nia isin mate iha semiteriiu dos Padres iha Maloa.
Entretantu iha Segunda (06/04/2026), Reverendo Saserdote Anibal da Costa Miranda Hatoba iha Parokia Same. Misa hamutuk ho familia iha Parokia Same, misa sei prezide husi Reverendo Amu Graciano Santos Baros, Vigario Geral Arquidioseze Dili.
Padre Anibal da Costa Miranda hakotu iis iha Segunda madrugada 05:30 iha Hospital Same, Munisípiu Manufahi.
“Arkedioseze Metropolitana Dili liu husi meiu ida nee hakarak fo hatene katak, ohin iha Hospital Same, Pe. Anibal da Costa Miranda fila hikas ona ba Aman Maromak nia kadunan santu. Ita harohan ba Amu Anibal da Costa Miranda ninia deskansa eterna,” haktuir media sosial Arkedioseze Metropolitana Dili.
(dom)
