DILI, STLTIMORLESTE.com – Akademiku konsidera katak, tempu too ona atu harii sentru juvenil, hodi nunee bele tau ketak dadur sira neebe ho idade sei joven.
“Realidade hatudu katak, ohin loron joven idade foin sae sira barak mak komete krime, tanba nee tenke tau sira separa ho dadur sira neebe idade boot, atu iha formasaun ketak ba sira hodi halo mudansa ba sira nia hahalok,” dehan Akademiku, Rafael de Jesus ba jornalista STL iha Kaikoli, Tersa (07/04/2026).
Nia hatutan, kria sentru ba dadur juvenil sira ketak, ida nee hanesan parte importante ida, oinsa joven sira neebe iha sentru juvenil tranforma sira nia aktu hodi sai husi fatin neeba sira labele halo tan krime.
Iha fatin ketak, Jurista Sergio Dias Quintas dehan, importante estabelese sentru juvenil.
“Hau nia hanoin importante para governu estabelese sentru juvenil hodi asegura direitu minoridade sira nee, tanba wainhira minoridade mak pratika krime ruma sira labele kastigu hamutuk ho ema boot iha prizaun,” dehan nia.
Nia esplika, laos tanba razaun sira sei idade kiik husik deit sira livre lae, maibe wainhira iha ona sentru juvenil sei akumula sira iha neeba hodi eduka sira, portantu sentru juvenil nee importante ba vida moris joven minoridade neebe pratika krime.
(ter)
