DILI, STLTIMORLESTE.com – Prokurador Jeral Republika (PJR) halo klarifikasaun kona-ba razaun avoka prosesu sira iha Komisaun Anti Korupsaun (KAK).
“Razaun ida nee kompetensia husi Ministeriu Publiku (MP), ita boot sira hatene nain ba prosesu mak MP, wainhira hau hakarak avoka nee avoka ona la iha razaun buat ida,” dehan Prokurador Jeral Republika, Nelson de Carvalho ba Jornalista sira iha Bebora, hafoin partisipa iha Aniversariu PSIC, Kinta (14/05/2026).
Nia hatutan, laos kestaun la iha ona konfiansa ba iha KAK, maibe ba fali iha ofisial no Prokurador sira mak halo investigasaun, tanba nee laos kestaun la iha konfiansa ba iha KAK.
Hatan kona-ba dehan PJR no Komisariu KAK iha dezentendimentu, PJR afirma nia la iha dezentendimentu ho ema ida ka ho KAK.
Esplika tan, se Komisariu KAK dehan PJR abuzu poder, ida nee PJR la hatene, maibe se dehan abuzu poder PJR husu bele halo partisipasaun. Konsidera katak, avoka prosesu iha KAK, tanba kompetensia.
“Tanba nee delega kompetensia, hau nia sasan tiha agora ba ona too tempu hau husu fila husu fila ka, nee hau nia sasan nee,” dehan PJR.
Iha fatin ketak, Jurista Sergio Dias Quintas dehan, nee hatudu sinal negativu katak, instituisaun estadu la solidu no la servisu hamutuk hodi kombate krime korupsaun.
“Wainhira instituisaun rua nee la koopera hamutuk bele hafraku KAK nee nia kompetensia rasik neebe previstu iha artigu 5 numeru 3 husi Lei numeru 8/2009,” sehan Sergio.
Tuir Sergio, iha lei nee hateten katak, iha materia investigasaun kriminal nian, komisaun mos bele husu ba Ministeriu Publiku atu foti medida kautelar ruma, tuir lejislasaun prosesual penal nian.
Artigu nee klaru, se MP la delega servisu ruma ba KAK em termos kompetensia, investigasaun KAK labele halo buat ruma, tanba MP mak titular ba aksaun penal.
Sergio sublina, espera katak instituisaun rua nee bele servisu hamutuk duke fahe malu haree interese nasaun, tanba se lae bele loke espasu ba koruptor sira hodi naok povu nia osan.
Afirma tan, karik iha buat ruma naksalak mak akontese buat sira nee, tanba instituisaun estadu hanesan KAK ho Ministeriu Publiku (MP) laiha superioridade maiba eziste mak interdependesia ba malu hodi kombate krime korupsaun.
Aleinde nee, Akademiku UNTL, Rafael de Jesus dehan, KAK no MP tenke servisu hamutuk hodi kombate krime korupsaun.
“Hau hanoin importante duni KAK no MP tenke servisu hamutuk hodi bele kombate krime korupsaun, se la servisu hamutuk mak susar atu kombate krime korupsaun,” dehan nia.
Hatutan tan, korupsaun aktu ida neebe la diak, tanba nee presiza halo prevensaun maibe Prokurador no KAK tenke servisu hamutuk.
(ter)
