DÍLI, STLTIMORLESTE.com – Kandidatu vaga permanente rejime espesial iha Hospital Nasionál Guido Valadares (HNGV) kontesta rezultadu teste eskrita Médiku Jerál Júnior A1-CpI, tanba suspeita irregularidade.
Kandidatu sira ne’e hato’o sira-nia lamentasaun liuhusi porta-voz Atanásio Flores, iha konferénsia imprensa, iha Jardim 5 de Maio, Colmera, Sesta-feira (21/06/2026).
Atanásio Flores afirma katak, prosesu rekrutamentu ba vaga permanente rejime espesial iha Hospital Nasionál Guido Valadares (HNGV) iha suspeita pratika favoritismu, nepotismu no familiarismu.
Nia dehan, suspeita irregularidade hirak-ne’e halo kandidatu sira sente la satisfás ho rezultadu teste eskrita ne’ebé realiza iha sentru formasaun profisionál (CFP).
Kandidatu sira mós alega katak, iha evidénsia kona-ba fraude durante prosesu rekrutamentu, inklui distribuisaun matéria teste ba kandidatu balun ne’ebé iha relasaun besik ho membru komisaun.
Durante teste eskrita, sira mós observa katak kandidatu balun konsege remata teste iha tempu menus husi minutu 30. Situasaun ne’e aumenta sira-nia suspeita kona-ba asesu ba matéria teste antes tempu.
Porta-voz Danio Ximenes afirma katak, sira iha evidénsia balun, inklui fotografia no mensajen liuhusi aplikasaun WhatsApp, ne’ebé sira konsidera relevante ba alegasaun irregularidade hirak-ne’e.
Tanba ne’e, kandidatu sira husu komisaun rekrutamentu atu anula rezultadu teste eskrita no suspende prosesu rekrutamentu to’o autoridade kompetente halo verifikasaun.
“Ami husu ba HNGV atu hapara prosesu rekrutamentu ne’ebé nakonu ho iregularidade sira,” dehan reprezentante kandidatu sira.
Aleinde ne’e, porta-voz Cesário Belo husu ba Komisaun Funsaun Públika atu akompaña no halo revizaun ba prosesu rekrutamentu, tuir lei no regulamentu ne’ebé vigora iha Timor-Leste.
Kandidatu sira mós apela ba Provedoria Direitus Umanus no Justisa (PDHJ) atu investiga kazu ne’e, tanba sira konsidera katak alegasaun irregularidade hirak-ne’e bele hamosu violasaun direitus umanus.
Sira mós husu Prezidente Repúblika no Primeiru-Ministru atu fó atensaun ba kazu ne’e no orienta entidade kompetente sira atu halo investigasaun.
Iha parte seluk, sira apela ba Parlamentu Nasionál atu hala’o fiskalizasaun ba prosesu rekrutamentu ne’e, no husu organizasaun sosiedade sivíl, inklui FONTIL no HAK, atu akompaña no monitoriza kazu ne’e.
(dom)
