BAUCAU, STLTIMORLESTE.com – Ministériu Juventude Desportu Arte no Kultura (MJDAK) aloka orsamentu hamutuk US$ 5.000 ba Sentru Juventude Munisípiu Baucau (CJMB) komemora loron 12 Novembru iha Baucau.
Diretór Ezekutivu CJMB Manuel de Carvalho Marques aprezenta, selebrasaun loron Juventude ba dala 21 no komemorasaun loron masakre Santa Cruz ba dala 35 iha loron 12 Novembru tinan ne’e, MJDAK aloka ona orsamentu ba CJMB atu selebra no komemorasaun loron refere iha nivel Postu Administrativu sira iha Munisípiu Baucau.
“Montante orsamentu ne’ebé mak aloka husi Ministériu Juventude, Desportu, Arte no Kultura mak totál US$ 5 mil,” Manuel de Carvalho Marques hateten ba STL, iha Uatulete, Baucau, Sesta (06/11/2026).
Nia esplika katak husi orsamentu totál US$ 5.000 ne’e, CJMB sei distribui US$ 4.480 ba Postu Administrativu hitu, ho kada Postu simu US$ 640 atu realiza atividade sira. Alokasaun ne’e la inklui Postu Administrativu Laga, tanba Postu refere hetan apoiu orsamentu diretamente husi nivel nasionál.
Enkuantu orsamentu restu US$ 520 sei utiliza husi ekipa komisaun atu mobiliza materiál no apoia programa Autoridade Munisípal Baucau nian ba selebrasaun no komemorasaun iha Postu Administrativu Quelicai.
Manuel subliña katak, komisaun organizadora sira ne’ebé instala ona iha nivel Postu Administrativu deside ona programa atividade sira, hanesan limpeza jerál, semináriu, kalan reflesaun, misa agradesimentu, kari ai-funan no sunu lilin iha semitériu sira ne’ebé determina ona husi komisaun organizadora.
Maibé propriu iha Postu Administrativu Baucau Vila, komisaun organizadora sei realiza atividade solidariedade hodi fó apoiu ba família vulnerável sira ne’ebé identifika ona iha Suku Bucoli. Apoiu ne’e sei limita de’it ba Suku Bucoli, la inklui suku seluk iha Baucau Vila, tanba limitasaun orsamentu no apoiu ne’e atu realiza liuhusi esforsu husi komisaun organizadora rasik.
Enkuantu iha Postu Administrativu Quelicai, komisaun organizadora sei realiza kompetisaun no diskursu públiku ho tema jerál “Espíritu 12 Novembru Lori Ita Hamutuk Harii Pás no Autór ba Dezenvolvimentu Sustentável”.
Atividade ne’e sei aborda subtema rua, mak valoriza unidade no sakrifísiu loriku aswain 12 Novembru hodi hametin identidade no istória hakat hamutuk ba futuru no hanoin fila-fali sakrifísiu jovem loriku aswain iha 12 Novembru 1991, ne’ebé sei envolve estudante no juventude besik na’in 10 atu diskute.
“Atividade ba Selebrasaun Loron Nasionál Juventude no Komemorasaun Masakre Santa Cruz ne’e ita sei hahú husi loron 10 to’o 12 Novembru. To’o oras ne’e, orsamentu husi Ministériu Finansas transfere ona ba konta bankária Sentru nian,” nia akresenta.
Nia informa katak iha loron 09 Novembru 2026, CJMB sei realiza enkontru koordenasaun ho prezidente komisaun organizadora sira husi Postu Administrativu, atu asegura ezekusaun orsamentu no preparasaun relatóriu final ba atividade refere.
Aleinde ne’e, iha Postu Administrativu Quelicai, komisaun organizadora deside atu realiza atividade kari ai-funan no sunu lilin iha Semitériu Lakudala, Quelicai, tanba tuir istória, fatin ne’e mós sai nu’udar fatin akontesimentu masakre durante períodu okupasaun Indonézia.
(tom)
