DÍLI, STLTIMORLESTE.com – Komisaun Funsaun Públika (KFP) no Banco Nasionál Komérsiu Timor-Leste (BNCTL) asina Memorandu Entendimentu atu fasilita funsionáriu públiku asesu ba kréditu.
Akordu ne’e iha objetivu prinsipál atu hafasil partilla informasaun kona-ba funsionáriu públiku (FP) no Ajente Administrasaun Públika (AAP), hodi hadi’a prosesu verifikasaun dadus no asesu ba kréditu.
Prezidente Komisaun Ezekutiva BNCTL, Marcelo da Cruz Carvalho esplika katak, kooperasaun ne’e iha objetivu tolu, inklui identifikasaun funsionáriu ne’ebé dadus profisionál no salariál seidauk kompletu.
Objetivu seluk mak identifika funsionáriu ne’ebé husu demisaun ka lisensa ho vencimentu, maibé servisu iha rai-li’ur, ne’ebé BNCTL seidauk iha informasaun atualizada kona-ba sira.
“Ami la hatene tuir no kontrola, tanba sira-nia dadus la mai. Tanba ne’e, ami hakarak servisu hamutuk ho KFP,” Marcelo dehan ba jornalista depois asina akordu iha edifisiu BNCTL Mandarin, Sesta (06/11/2026).
Nia hatete katak, liuhusi sistema partilla informasaun, BNCTL bele asesu diretamente ba dadus funsionáriu sira nian, lahó nesesidade atu husu dokumentu individualmente.
Marcelo mós informa katak taxa juros kréditu iha BNCTL ki’ik, ho taxa másima 5%.
Nia hato’o apresiasaun ba KFP tanba inisiativa estabelese MoU ne’e, ne’ebé bele apoia servisu bankáriu, liuliu verifikasaun dadus funsionáriu públiku sira nian.
Antes ne’e, BNCTL hasoru difikuldade atu asesu no verifika estatutu funsionál kliente sira, inklui distinsaun entre funsionáriu permanente no kontratadu.
Iha parte seluk, Prezidente Interinu KFP, José Telo Soares Cristóvão hatete katak, MoU ne’e sei fasilita funsionáriu públiku sira asesu ba kréditu, liuhusi prosesu ne’ebé lalais no simples.
“Durante ne’e, funsionáriu sira hasoru problema tanba prosesu kréditu naruk. Ho MoU ne’e, prosesu bele fasilita no lalais liután,” nia afirma.
Tuir José Telo, dadus funsionáriu sira sei asesível liuhusi Sistema Informasaun Jestaun Administrasaun Públika (SIGAPNET), atu BNCTL bele halo verifikasaun tuir kritériu ne’ebé eziste.
Serimónia asinatura MoU ne’e kontinua ho aprezentasaun produtu no servisu finanseiru BNCTL nian ba KFP, no aprezentasaun sistema SIGAPNET ba BNCTL.
Atividade ne’e nia objetivu atu hametin koñesimentu no komprensaun mútua kona-ba servisu no sistema ne’ebé instituisaun rua utiliza.
KFP hato’o apresiasaun ba lideransa no dirijente BNCTL sira-nia disponibilidade no kompromisu atu hametin kooperasaun institusionál.
Kooperasaun ne’e la’ós de’it atu fasilita asesu ba kréditu, maibé mós promove benefísiu mútuu entre instituisaun rua, hadi’a bem-estar funsionáriu públiku no kontribui ba dezenvolvimentu nasionál.
(dom)
