LAGA, STLTIMORLESTE.com – Autoridade Postu Administrativu Laga, Munisipiu Baucau, selebra loron restaurasaun independensia ba dala 24 iha Suku Ueru-Mata, Laga, maibe iha serimonia nee kontribui masimu husi komunidade sira, tanba orsamentu neebe Governu aloka ba loron nasional nee limitadu.
Administrador Postu Laga, João Freitas de Castro hateten, selebrasaun loron 20 Maiu nuudar festa popular iha neebe kada Postu ida akumula nia komunidade sira selebra loron refere, maibe orsamentu neebe Governu aloka orsamentu ba seremonia nasional iha Postu Laga, neebe realiza iha Suku Ueru-Mata la sufisiente, tanba nee komunidade sira inisiativa kontribui tuir kbiit neebe iha hodi selebra loron nasional refere.
“Tuir ami Autoridade nia orsamentu la sufisiente, tanba nee ami nafatin rekomenda ba Governu, atividade nee popular ita akumula ema barak prezisa orsamentu sufisiente para ita bele halo atividade diak neebe benefisiu ba ita nia komunidade,” Administrador Postu Laga, João Freitas de Castro hateten ba jornalista sira hafoin remata seremonia isar bandeira 20 Maiu iha Suku Ueru-Mata, Kuarta (20/05/2026).
Nia sublina, orsamentu neebe Governu aloka ba seremonia nasional nee ho montate US$ 700, iha neebe la kobre ba atividade sira neebe planu envolve iha seremonia refere hodi anima komunidade sira.
Tanba nee husu Governu atu koloka orsamentu ba loron nasional sira hanesan 20 Maiu, 30 Agostu no 28 Novembru, Governu prezisa aumenta orsamentu ba seremonia, nunee bele anima komunidade sira iha baze, maibe onradu ba komunidade Ueru-Mata, neebe iha inisiativa patriotizmu kontribui masimu iha selebrasaun 20 Maiu ba dala 24.
“Orgulhu tebes, maske Suku ida nee baliza tiha Munisipiu Lautem, maibe komunidade entusiasmu, patriotizmu ohin loron sira kontribui,” João Freitas de Castro komenta.
Iha fatin hanesan Xefe Ueru-Mata, Sabino Martins aprezenta, selebrasaun loron refere iha Suku Ueru-Mata laos festa unika ba komunidade Suku Ueru-Mata nian deit, maibe festa nasional neebe iha territoriu nasional kauze selebra iha kada Postu Administrativu, tanba nee iha Postu Laga deside realiza iha Suku Ueru-Mata nuudar Suku foun neebe foin estabelese husi Governu atual.
“Ami kontente tebes festa ida nee realiza iha ami nia Suku, tanba 2025 realiza ami nia Suku 2026 realiza tan isar bandeira iha ami nia Suku, ami kontente tebes,” Sabino espresa.
Nia komenta, kontribuisaun husi komunidade Suku Ueru-Mata ba serimonia refere ho voluntariamente no dignidade nuudar fo onra ba eroi no eriona sira neebe la sura kolen luta ba rai doben Timor-Leste.
“Orsamentu husi Governu Sentral US$ 750, maibe ami kontribuisaun ami husi komunidade rasik ami nia oan sira neebe servisu iha dispora funsionariu veteranus ami nia maluk balu mos kontribui orsamentu hamutuk US$ 7.037,” Sabino aprezenta.
Nia espresa, valor imoportante husi kontribuisaun komunidade Ueru-Mata nian ba loron nasional nee laos atu sura, maibe nuudar orgulhu ida, tanba bele halibur komunidade husi Suku 8 neebe eziste iha Postu Laga liu liu komunidade sira neebe vitima ba funu naruk Timor nian, atu lembra no haluhan istoria pasadu neebe moruk.
Enkuantu komunidade Suku Ueru-Mata, Jacinto Martins sente kontente ho selebrasaun loron 20 Maiu ba dala 24 neebe deside realiza iha Suku Ueru-Mata, mezmu la hetan benefisiu husi selebrasaun refere, maibe nuudar momentu neebe bele reflete istoria pasadu, tanba neebe voluntariamente kontribui orsamentu ba seremonia refere, nuudar dignidade ba loron refere.
“Se ami la halo hanesan fali hatun ami nia dignidade, tanba nee ami tenke esforsu aan meske Suku foun ami komunidade oituan deit maibe nee loron importante ita la haree ba orsamentu, maibe fo onra no gloria ba eroi sira neebe mate ba rai ida nee,” Joanico espresa.
Entretantu selebrasaun loron 20 Maiu iha Suku Ueru-Mata hetan partisipasaun husi, reprezentante Komadante Polisia Eskuadra Laga, Administrador Postu Laga, Veteranus, Autoridade lokal husi Suku 8, Komunidade inklui estudante sira. No hafoin serimonia isar bandeira kontinua kedas ho jogus trandisional mak hanesan dada tali, halai karon no seluk tan, iha neebe durante serimonia nee hetan seguransa masimu husi Polisia Eskuadra Postu Laga.
(tom)
