DÍLI, STLTIMORLESTE.com – Komunidade liu liu kondutor no pasajeiru sira hatoo reasaun makas hasoru auto estrada iha Suai neebe oras nee transforma tiha ba tahu laran. Liu husi telefone komunidade barak mak hatoo sira nia preokupasaun no lamentasaun konaba dezafiu boot neebe sira hasoru iha terrenu ba mobilidade no seguransa rodaviaria.
Kondisaun grave nee laos deit hapara movimentu transporte, maibe mos hamosu preokupasaun boot husi populasaun neebe depende deit ba kualidade estrada ba sira nia moris loron loron nian.
Bainhira hatoo preokupasaun liu husi telefone, komunidade Antônio da Silva kestiona kualidade obra neebe halo iha tinan hirak liu ba, tanba la dura iha tempu naruk no lalais deit aat fali bainhira udan mai.
“Kondisaun nee halo ami preokupa tebes, tanba Governu gasta osan boot ba auto estrada nee, maibe rezultadu mak transforma fali ba tahu dodok,”dehan Antônio ba STL liu husi telefone, Segunda (25/05/2026).
Liu husi ligasaun telefone nee, nia husu ba governu liu husi Ministeriu Obras Publika (MOP) atu foti fali asau urjente hodi fo solusaun neebe loloos, labele hein too situasaun nee hamosu fali dezastera neebe boot liu tan.
Iha parte seluk situasaun auto estrada neebe nakonu ho tahu nee mos sai topik neebe manas tebes iha mundu virtual iha pajina media sosial Facebook, netizen no komunidade sira espalha foto ida neebe hatudu klaru kareta Hikux mutin ida luta dadaun iha tahu laran, akompanha ho ai (besi) no ai tahan sira iha auto estrada ninin.
Foto ho vidio neebe sai viral ka naklekar iha Facebook nee hetan kedan reasaun husi utilizador barak, neebe fo komentariu oin oin hodi kritika kualidade infraestrutura nee, no balu mos preokupa ho seguransa bainhira halo viajen liu husi fatin neeba.
Entretantu too notisias nee hatun husi STL,ekipa redasaun seidauk konsege hetan konfirmasaun ka komentariu ruma husi parte Governu liu liu Ministeriu Obras Publika (MOP), konaba preokupasaun no reasaun makas husi komunidade sira nee.
(car)
