DILI, STLTIMORLESTE.com – Komunidade Sant Egidio Timor Leste (TL) neebe lidera husi Olga Theresia Corbafo hamutuk ho Padre Jovito Rego de Araujo selebra Misa Pentakosta ho orasaun ba dame nian no sunu lilin ba nasaun 24 neebe sei iha situasaun funu nia laran.
Misa Pentakosta neebe prezidi husi Pe. Jovito Rego de Araujo realiza iha Kapela Estasaun Saun Miguel Arkanjo Surikmas, Dili, Domingu (24/5/2026).
Familia boot komunidade Sant Egidio Timor Leste selebra Misa Pentakosta nuudar loron ikus Paskua nian no selebra mos loron moris Pe. Juvito Rego de Araujo nian ba dala 63 (23 Maiu 1963-23 Maiu 2026).
Iha biban nee, Komunidade Sant Egidio ho Amu Jovito halo orasaun dame nian no sunu lilin ba nasaun 24 neebe sei iha situasaun funu nia laran, atu nunee sira bele dame malu no hakotu situasaun neebe halo terus sira nia povu rasik no fo impaktu ba nasaun sira seluk.
Pe. Jovito Rego de Araujo liuhosi omilia hatete Pentakosta hanesan loron ikus Paskua nian, loron 50 depois Paskua, loron neebe espiritu santu tun mai fo forsa no kbiit ba eskolante sira neebe subar-an tanba tauk Judeus sira, hodi brani sai ba liur hodi hahu misaun uma kreda nian.
“Pentakosta nee ita selebra depois loron 50 paskua, loron espiritu santu tun mai. Uluk espiritu santu tun ba apostolu sira, ohin espiritu santu tun mai fo forsa no kbiit ba eskolante sira nia tauk no subar hela hodi sai ba liur hahu misaun uma kreda nian. Pentakosta hanesan festa neebe Maromak nia espiritu ida neebe promete nia ba tiha horik nafatin ho ita, espiritu ida nee mak agora sai forsa, sai kbiit, sai vida uma kreda nian, neebe iha foho Sinai Moises simu lei husi Maromak,” hatete Pe. Jovito.
Nia haktuir tan katak Pentakosta nee selebra loron neebe Maromak haraik Espiritu Santu ba apostolu sira, sai husi neeba hahu misaun igreja ninian.
“Hahu loron Segunda tama ona tempu bain-bain, tama ho kbiit espiritu santu nian sai manu ain durante tinan tomak nia laran karik sei moris sei selebta Paskua tinan oin mai,” katak Pe. Juvito.
Iha fatin hanesan, Koordenador Komunidade Sant Egidio Timor Leste, Olga Theresia Corbafo hatete, haksolok ba ema hotu liu-liu espiritu santu hiit an mai iha loron espesial ida nee, loron Pentakosta nian.
“Hanesan membru Sant Egidio haksolok tebes tanba komunidade Sant Egidio komesa buras no kontinua luta iha Timor. Membru sira neebe partisipa iha selebrasaun loron Pentakosta nee mai husi Bobonaro, Hera no Dili,” katak Olga.
Nia mos dehan, mensajem neebe hato’o ba komunidade Sant Egidio foka liu ba dame no unidade.
“Liu husi Pentakosta nee, komunidade Sant Egidio sunu lilin no halo orasaun dame nian ba nasaun sira neebe iha hela situasaun konflitu no funu nia laran hodi hetan lalais dame no hakotu konflitu sira. Mensajem mos ba membru sira luta hamutuk nomos unidade,” hatete Olga Corbafo.
Misa hotu, iha Domingu lokraik, komunidade Sant Egidio halibur malu iha Aula Kapela Estasaun Saun Miguel Arkanjo halo reflesaun Pentakosta, hare video husi Vatikanu, han kalan hamutuk no huu lilin Amu Jovito Rego de Araujo nian tinan.
Iha loron 50 liu ba, Pe. Jovito mos selebra Misa Semana Santa ho Komunidade Sant Egidio Timor Leste neebe marka prezenza mos Responsabel Komunidade Sant Egidio ba Azia Sul, Valeria Martano.
Iha momentu neeba prezensa Valeria Martano iha Timor Leste ho objetivu selebra Paskua dahuluk ho komunidade Sant Egidio iha Timor Leste nomos halao retiru loron tolu ho komunidade Sant Egidio iha Uma Madre Kongregasaun OSF, Taibessi, Dili.
(mik)
