LAUTEM, STLTIMORLESTE.com – Postu Saude Baduro iha Postu Administrativu Lautem, Munisipiu Lautem, atualidade iha deit pesoal saude nain ida, situasaun nee komunidade sira preokupa, tanba durante tempu udan atendimentu saude dala barak la lao normal.
Xefe Suku Baduro, Faustino Dias Almeida, hatete katak pesoal saude neebe Ministeriu Saude koloka iha Postu Saude Baduro hela iha area Laivai, Lautem, no durante tempu udan difisil atu ba servisu iha Postu Saude Baduro, tanba problema asesu kondisaun estrada aat.
“Doktor iha neeba nain ida deit. Tempu udan ona nia la ba, nee difikulta ba komunidade sira, laos ba hau nia komunidade iha Suku Baduro deit, maibe afeta ba suku haat nee hotu,” hateten Faustino ba STL iha Sica, Sabadu (23/05/2026).
Nia esplika katak, falta pesoal saude no atendimentu durante tempu udan afeta ba komunidade sira neebe presiza tratamentu mediku urgente, liu liu labarik, inan isin gravida no katuas ferik sira.
Nia argumentu, mezmu mediku neebe atual koloka iha Postu Saude Baduro husi Laivai ba halao servisu dala barak impaktu husi udan no kondisaun estrada nunee atendimentu la lao normal, maibe Postu Saude Baduro la serve atu koloka deit pesoal saude nain ida, tanba Postu Saude refere nia area kobertura ba tratamentu saude nian kobre Suku 4, mak hanesan Suku Maina Primeiru, Maina Segundu, Serlau no Baduro rasik.
“Ami husu aumenta parteira no enfremeiru, tanba ida agora servisu iha neeba nee parte Lautem mos nia inklui iha laran entaun semana ida nia la full iha neeba, tanba servisu balu neebe nia prezisa halo iha Lautem,” Faustino komenta.
Autoridade lokal nee husu Ministeriu Saude atu aumenta pesoal saude iha Postu Saude Baduro nunee asegura atendimentu regular atu komunidade sira bele asesu ba servisu saude diak no lalais.
Enkuantu too notisia nee publika, STL seidauk hetan konfirmasaun husi Servisu Munisipal Saude Lautem.
Entretantu, Suku Baduro iha Aldeia lima, mak Malailada, Irpala, Lua-Dau, Tamaro no Lakulmonu, ho populasaun hamutuk ema nain 1.870.
(tom)
