DILI, STLTIMORLESTE.com – Timor oan Caetano Jose Freitas sente orgulhu, kontente partisipa konferensia no aprezentador artigu sientífiku ho títulu “Simplified Stiffness Models, Numerical Optimization of Story-Dependent Calibration for RC Moment Frames” iha International Conference on Structure and Civil Engineering Research (ICSCER) Barcelona.
Timor oan Caitano Jose Freitas daudaun nee halao profisaun nuudar Funsionariu Publiku destakadu iha Gabinete Pro-Reitoria Assunto Desemvolvimento Infraestruta – UNTL, Nuudar Eng. Civil hatoo kestaun nee ba STL iha nia knaar fatin Bairo Pite, Tersa nee (02/06/2026) hatete, sente orgulhu hodi partisipa iha International Conference on Structure and Civil Engineering Research iha Barcelona.
“Ba hau rasik, partisipasaun iha ICSCER 2026 nee hau senti orgulhu, gratidaun no responsabilidade boot. Orgulhu tanba hau bele lori rezultadu peskiza iha area Engenharia Sivíl ba forum internasional, gratidaun tanba dalan edukasaun no peskiza nee loke oportunidade atu aprende husi akademiku no peskizador husi nasaun oioin, no responsabilidade tanba esperiensia nee hatudu mai hau katak juventude Timor-Leste mos bele kontribui iha nivel global bainhira iha preparasaun, displina, no persistensia,” dehan nia.
Nia hatete, esperiensia foun neebe hetan iha forum internasional, aprende laos deit husi ninia peskiza rasik, maibe mos husi komentariu, pergunta, no perspetiva husi peskizador seluk. Ida nee ajuda nia haree katak area Engenharia Sivíl iha mundu kontinua dezenvolve, no Timor-Leste presiza prepara joven sira atu bele tuir no kontribui iha dezenvolvimentu nee, liu liu iha area estrutura, konstrusaun, infraestrutura, no peskiza sientífika.
“Ba foinsae Timor Leste sira, hau hakarak fo mensajen katak estuda nafatin, aprende nafatin, no labele tau limite ba imi-nia mehi. Dalan ba suksesu la sempre fasil, maibe esforsu no displina sei lori ita ba fatin neebe ita la imajina antes. Nasaun ida nee nia futuru iha joven sira nia liman;,tanba nee, ita tenke prepara ita-nia kapasidade, karakter, no konesimentu hodi kontribui ba Timor-Leste ho dalan ida neebe diak liu,” dehan Caitano.
Caitano haktuir tan katak, iha konferensia ICSCER 2026 nee partisipa hanesan aprezentador ba artigu sientífiku ho títulu “Simplified Stiffness Models’.
International Conference on Structure and Civil Engineering Research mak konferensia internasional ida iha area Engenharia Estrutura no Engenharia Sivíl neebe organiza kada tinan hodi reune akademiku, peskizador, estudante pos-graduasaun, no profisional engenharia husi universidade no instituisaun oioin iha mundu. Konferensia ida nee nia objetivu prinsipal mak atu fahe rezultadu peskiza, inovasaun teknolojika, no dezenvolvimentu sientífiku iha area estrutura no engenharia sivíl.
Ba tinan 2026, ICSCER halao hamutuk ho ICEEA 2026 iha Barcelona, Espanha, durante loron tolu (3) husi 29–31 Maiu 2026, ho lokal prinsipal iha Salles Hotel Pere IV. Konferensia nee lidera husi Prof. Roberto San Jose, Technical University of Madrid, Spain, Hanesan Conference Chair, no apoiu husi Prof. Eric Strauss, Michigan State University, USA, no Prof. Eric van Hullebusch, Universite Paris Cite, France, hanesan Conference Co-Chairs. Konferensia nee simu aproximadamente 130 submisaun artigu/paper, no iha maizumenus 50 partisipante konfirmadu husi nasaun oioin.
Artigu sira neebe passa iha ICSCER 2026 sei publika iha conference proceedings husi E3S Web of Conferences, open access proceedings iha area Environment, Energy and Earth Sciences, no sei submete ba Scopus, CAS, Thomson Reuters, DOAJ, EBSCO, no ProQuest atu konsidera ba indexing. Programa konferensia nee inklui 3 Keynote Speakers, 5 Invited Speakers, 4 onsite sessions, no 1 online session.
Topiku sira neebe diskute iha konferensia nee kobre area environmental engineering, structural engineering, civil engineering, construction technology, digital engineering, sustainable urban systems, no structural performance.
“Iha konferensia ICSCER 2026 nee, hau partisipa hanesan apresentador ba artigu sientífiku ho títulu “Simplified Stiffness Models, Numerical Optimization of Story-Dependent Calibration for RC Moment Frames”, neebe tama iha Session 3, Green Construction, Structural Performance, and Digital Engineering Technologies. Artigu ida nee foka ba area engenharia estrutura, liuliu kona-ba rigidez lateral iha estrutura portiku betaun armadu. Ho liafuan simples, peskiza nee estuda oinsa edifísiu betaun armadu responde bainhira hetan carga lateral, hanesan anin makaas ka movimentu rai-nakdoko,” katak nia.
Nia hatutan, objetivu husi peskiza nee mak atu kompara rumus klasik neebe normalmente uza ba estimasaun rigidez lateral, depois desenvolve modelu simplifikadu foun neebe bele ajuda engenheiro sira analiza komportamento estrutura ho dalan neebe simples, maibe nafatin bazeia ba dadus numeriku no prinsipiu sientífiku. Peskiza ida nee halo durante ninia estudu Mestradu Engenharia Sivíl iha Universidade Atma Jaya Yogyakarta, Indonezia, hamutuk ho Prof. Yoyong Arfiadi hanesan co-author no orientador akademiku.
Sertifikadu nee fo hanesan prova partisipasaun akademika iha konferensia internasional, liuliu hanesan apresentador ba artigu sientífiku neebe foka iha area engenaria estrutura, no mos hanesan rekonesementu ba kontribuisaun peskiza neebe halao.
“Ba hau, atividade ida nee laos deit kona-ba apresenta artigu no simu sertifikadu, maibe kona-ba esforsu atu lori peskiza husi Timor-Leste no husi universidade ba nivel internasional. Esperiensia nee sai motivasaun atu kontinua aprende, halo publikasaun sientífika, no kontribui ba dezenvolvimentu kapasidade akademika no engenharia iha ita-nia rai. Maske dalan la sempre fasil, esperiensia nee hanorin katak esforsu, displina, no persistensia bele loke dalan ba oportunidade boot liu tan,” hakotu.
(eme)
