BAUCAU, STLTIMORLESTE.com – Tribunal Judisiál Primeira Instánsia Baucau hala’o primeira interrogatóriu ba kazu asaltu no atake hasoru membru Polísia iha Suku Baguia, Postu Administrativu Quelicai, Munisípiu Baucau.
Primeira interrogatóriu ne’e realiza iha loron 05 Novembru 2026, iha parte loraik, iha Tribunal Judisiál Primeira Instánsia Baucau. Maibé, hafoin prosesu interrogatóriu remata, seidauk iha desizaun final, no arguídu na’in tolu kontinua detidu iha sela polísia.
Advogadu, Cristovão N. Nuno Ximenes hateten katak, tuir rezultadu primeira interrogatóriu, Ministériu Públiku akuza arguídu sira ho krime rua, mak obstrusaun ba via públika no danu agravadu.
“Rezultadu primeira interrogatóriu ne’e krime rua, obstrusaun autoestrada no krime ida mak danu agravadu,” hateten advogadu privadu Cristovão N. Nuno Ximenes, iha resintu Tribunal Distritál Baucau, Kinta (05/11/2026).
Nia esplika katak, Ministériu Públiku akuza arguídu sira tuir dispozisaun Artigu 259 husi Kódigu Penál, no prosesu ne’e sei kontinua ho leitura akordaun tribunal nian iha loron 06 Novembru 2026.
Cristovão afirma katak, arguídu na’in tolu konfesa parte husi akontesimentu ne’ebé akontese, maibé sira rejeita alegasaun balu ne’ebé Ministériu Públiku aprezenta, inklui alegasaun kona-ba baku kareta no tebe membru polísia
“Sira na’in tolu konfesa katak akontesimentu balu loos, balu la loos. Buat balu ne’ebé Ministériu Públiku akuza, hanesan baku kareta, tebe polísia no foti estik tuda kareta ne’e ne’e dehan la loos,” Cristovão komenta.
Nia hatutan katak, desizaun kona-ba medida koasaun ba arguídu sira sei depende ba deliberasaun tribunal nian.
Arguídu na’in tolu ne’e identifika ho inisiál JMS, FS no JS.
Primeira interrogatóriu ne’e prezide husi Juiz Singular Evangelino Belo, ho reprezentante Ministériu Públiku, Ambrosio Rangel Freitas, no defeza ba arguídu sira husi advogadu privadu Cristovão N. Nuno Ximenes.
Entertantu kazu ne’e akontese iha loron 03 Novembru 2026.
(tom)
