DILI, STLTIMORLESTE.com – V Konferensia OPMT iha Postu Administrativu Uatulari, Munisipiu Viqueque, sai nuudar naroman foun hodi konsolida forsa feto nian hodi hasoru dezafiu foun iha era independensia.
Iha biban nee Konselhu Koordenador OPMT Nasional, Zelia Fernandes ba STL Tersa nee (02/06/2026) hatete, objetivu ba V konferensia neebe foin lalais halao iha Munisípiu Viqueque iha area Postu Administrativu Uatulari, objetivu atu konsolida feto hodi hasoru dezafiu foun iha era independensia.
Konselhu Koordenadór dehan, foin lalais halao V Konferensia Postu nian ho tema boot “Solidariedade Interjerasional, Dignifika Pasadu, Inspira Futuru hodi hamutuk atu Transforma”. Eventu polítiku neebe nakonu ho espíritu revolusionariu nee sai nuudar naroman foun hodi konsolida forsa feto nian hodi hasoru dezafiu foun iha era independensia.
“V konferensia ida nee ho objetivu neebe mak klaru tuir tema neebe iha oinsa atu bele konsolida feto hodi luta hasoru dezafiu iha era indepedensia ida nee,” dehan nia.
Konselhu Koordenador Nasional, Zelia Fernandes hatutan tan katak, OPMT laos organizasaun ba ferik sira deit, maibe organizasaun ba jerasaun hotu. Iha tinan 50 nia laran (1975–2025), OPMT hatudu ona katak susesu FRETILIN nian sempre sura mos husi kontribusaun feto sira nian.
Nia mos aprezenta pontu estratejiku tolu (3) neebe sai baze ba OPMT Uatolari oin mai mak Dignifika Pasadu (Unidu iha Istoria) Rekonese veterana sira nuudar Mestra, Edukadora, no Konselleira neebe fo naroman ba feto foin-sae sira, segundu Inspira Prezente no Futuru (Transforma ho Inovasaun) Se uluk funu hasoru invazor, ohin loron funu hasoru ma-nutrisaun, analfabetismu, kiak, dezigualdade, no krime transnasional (mafia) neebe ameasa soberania. Solusaun mak kahur kbiit jerasaun 75 nian ho inovasaun no teknolojia husi jerasaun foun.
No ikus mak Reorganizasaun no Aksaun Baze Serbisu husi baze (aldeia, suku, eskola, merkadu) hodi halo tranzisaun lideransa neebe armonizadu. Mehi boot mak: Feto OPMT tenki sai forsa politika ida ba FRETILIN.
Nia akresenta tan katak, presiza tau hamutuk Solidariedade Interjerasional hodi sai ponte neebe liga jerasaun feto funu-nain sira ho jerasaun feto foin-sae ohin loron nian. Solidariedade feto hotu-hotu lao hamutuk, la husik ida ba kotuk, Uluk luta ba Ukun Rasik An, ohin loron luta ba moris-diak.
Aleinde nee iha V Konferensia, Juvita Soares re-eleita nuudar Koordenadora OPMT Postu Uatolari ho nia estrutura mak I vise Julia S. de J. Braga, II vise Joaninha Soares Menezes, sekretaria Esperansa Alves Xavier no tezoreira mak Silvina da Costa.
V Konferensia Postu Administrativu nee partisipa husi delegada sira husi Aldeia 63 no suku 8 ho kompozisaun par par ba idade menus 35 no mais 35 husi kada aldeia no mos kada Suku. Nunee, total delegada konvokada hamutuk 151 inklui inherensia funsoes no marka prezensa delegada hamutuk 135. Iha abertura V Konferensia Postu Administrativu OPMT Uatolari nian hetan partisipasaun masimu husi estrutura komisaun politiku partidu FRETILIN, Estruturaa OPMT munisipiu Viqueque, Komisaun Nasional Fiskalizasaun OPMT, Veteranu veterana sira, Juventude FRETILIN (JF), organizasaun filiadas sira.
(eme)
