DILI, STLTIMORLESTE.com – Ministeriu Publiku (MP) iha alegasaun ba kazu neebe deskonfia naok karteira rezulta Nadine Ribeiro Do Carmo lakon vida no Euodia Agile Do Carmo hetan kanek tama ba iha faze alegasaun.
Iha alegasaun Ministeriu Publiku (MP) neebe reprezenta husi Prokurador Turnu Aderito Tilman husu ba iha Tribunal atu aplika medida Prizaun Preventiva (PP) ba iha arguidu nain rua ho inisial JACR no MZX.
Enkuantu defeza husi arguidu nain rua nian, Defensor Publiku Fernando de Carvalho husu Tribunal atu aplika Medida Aprezentasaun Periodika ba arguidu nain rua.
Rona tiha alegasaun, Tribunal suspende ba iha oras tuku 14 hodi rona despaisu ikus Tribunal.
Prosesu primeiru interogatoriu nee prezide husi Juiz Turnu Ivan Patrocenio, Ministeriu Publiku reprezenta husi Prokurador Aderito Tilman, arguidu nain rua hetan asistensia legal husi Defensor Publiku, Fernando de Carvalho.
Arguidu nain rua lori mai Tribunal iha oras tuku 9:00 dader, akompanha husi Autoridade Seguransa Polisia Nasional Timor Leste (PNTL).
Prosesu mai iha Tribunal ho numeru Nuc, 0602/26.PNSIK, no Ministeriu Publiku (MP) promove arguidu nain rua ho krime tolu, Roubu, Ofensa Neglijente, Homesidu Neglijente.
Rekorda katak, suspeitu nain rua Polisia detein tanba deskonfia naok karteira iha Praia Dos Coquiros iha loron 07 fulan Junhu, hodi rezulta Nandine lakon vida.
Husi akontesimentu nee, ikus mai autoridade seguransa detein suspeitu nain rua iha BTN Tasi Tolu.
No informasaun neebe relata husi PNTL katak, motor neebe suspeitu nain rua utiliza nee laos suspeitu nain rua nian. Tanba nee se mak motor lakon bele hatoo informasaun hodi identifika motor nee.
(ter)
