MANATUTO, STLTIMORLESTE.com – Sarani sira iha Paroquia Soibada husu Dioseze Baucau atu reabilita hikas kolejiu antigu Soibada neebe uluk sai fini fatin ba Timor oan, atual hela ho kondisaun dodok.
Dato Leo-hat Orlando Doutel Sarmento Pinto konta, kolejiu soibada neebe harii iha tempu portugues konsege transforma Timor oan lubuk ida sai matenek, mak hanesan atual Prezidente Republika (PR) José Ramos Horta no figura nasaun seluk tan nomos figura relijiosu Katolika Timor nian lubuk ida neebe eskola iha kolejiu Soibada. Kolejiu neebe iha uluk akumula feto no mane ho uma hamutuk unidade aat kompostu sala dormitoriu ba mane no feto, fatin apredende matenek inklui fatin refetori. Maibe atual uma kolejiu antigu nee hela ho kondisaun dodok.
“Ami husu beibeik mos uma haat nee aat nafatin seidauk hadia, uma nee uluk sira agora boot hotu ona nee mak eskola iha nee, maibe agora aat hela deit hanesan nee nain laiha atu hadia,” hateten Dato Leo-Hat ba STL iha Soibada, Sesta (12/06/2026).
Nia espresa, haree ba uma kolejiu antigu refere, parte Dato no Liurai hamutuk ho paroquia Soibada diriji ona proposta ba Diozese Baucau husu atu reabilita no kontinua utiliza ba kolejiu Soibada nian, maibe seidauk hetan rezultadu.
Nia komenta, proposta neebe diriji ba Diozese no seidauk iha rezultadu ba reabilitasaun uma kolejiu antigu refere, halo sarani sente triste, tanba uma refere uluk tempu uluk sai fatin dahuluk ba Timor oan sai matan badaen neon makerek, hanesan lakeru nia hun no abut iha Soibada nia dikin nanin ba tasi no foho, maibe atual kolejiu Soibada namlaek hanesan ai-horis laiha abut.
“Uluk tempu portugues katuas sira dehan, lakeru nia hun iha Soibada nia dikin too tasi no foho, entaun Soibada uluk buras tanba iha eskola kolejiu nee, maibe agora namlaek. Ita laos konta ita nia boot sira mais ami husu buat nee bele hadia ga lae,” Orlando Doutel Sarmento Pinto akresenta.
Dato Leo-Hat nee husu lider Igreja Katolika no Governante sira neebe uluk eskola iha kolejiu Soibada atu reabilitasaun hikas kolejiu antigu refere hodi kontinua utiliza ba fatin matenek nian hanesan eskola kolejiu Soibada nunee bele kontinua transforma Timor oan sira sai matan badaen neon makerek tuir Dato sira nia hakarak. Maibe la aseita atu reabilita utiliza fali ba hotel, tanba hotel laos fatin ba apredende matenek.
Iha fatin hanesan, Veteranus Agrepino Sarmento kodigu “Loisiri” konsidera, kolejiu antigu Soibada nuudar fini fatin ba Timor, tanba rekursu umanu potensial sira neebe atual namkari iha territoriu nasional barak liu nia inisiu aprende husi Soibada hafoin habelar ba Timor oan hotu.
“Igreja Soibada viveru de Timor, fini husi nee mak fahe ba Lorosa’e no Loromonu harii ema matenek lubuk ida hanesan Prezidente José Ramos Horta, Nicolão Lobato, Francisco Xavier do Amaral sira no Bispu amu lulik sira barak mak eskola iha nee mak fahe ba Lorosa’e Loromonu,” Loisiri konta
Veteranus nee espresa sentimentu triste haree kondisaun uma kolejiu antigu Soibada neebe atual kondisaun aat no laiha atensuan husi parte kompetente sira.
“Uluk kantiga katuas sira hananu hanesan nee, tali boka hun nee hun kiak ona, kata lemorai hun kiak ona, matenek hotu hotu sai husi nee oan loron Soibada hela ho kondisaun nunee,” Loisiri komenta.
Entretantu observasaun STL nian iha terrenu nota katak, uma kolejiu antigu refere mezmu nia estrutura husi fondasi, parede too kakuluk sei mantein, maibe la bele utiliza ona, tanba kondisaun amesaun.
(tom)
