DILI, STLTIMORLESTE.com – Tenente Jeneral Reformado Lere Anan Timur husu foinsae diak liu estuda no tau prioridade ba istoria, duke uza teknolojia ba halimar deit.
Jeneral (Ref.) Lere Anan Timur, Asesor Polítiku ba Prezidente Republika, Jose Ramos-Horta, hatoo kestaun nee bainhira sai orador prinsipal iha seminariu edukasaun sidadania boot ida neebe halao iha Salaun Parokia Sagrado Coração de Jesus, Venilale, Sabadu (13/06/2026).
Iha nia intervensaun, Jeneral Lere halo apelu forte ba foinsae sira atu fo balansu entre sira nia direitu pesoal no kumprimentu dever nian ba Estadu. Nia fo avizu hasoru distrasaun husi era dijital, hodi husu ba estudante sira atu fo prioridade ba estuda istoria nasional duke uza teknolojia ba deit halimar.
Eventu nee organiza husi Konsellu Nasional Juventude Timor-Leste (CNJTL-sigla ingles) ho apoiu husi Gabinete Apoiu Sosiedade Sivíl (GASC), eventu nee ho objetivu atu inspira estudante sira hodi simu responsabilidade nasional. Jeneral Lere enfatiza katak, enkuantu jerasaun katuas sira asegura tiha ona Timor Leste nia independensia liu husi sakrifísiu no luta, foinsae sira tenke proteje liberdade nee liu husi edukasaun, disiplina, no partisipasaun sivika neebe ativa.
Jeneral Lere halo apelu forte ba foinsae sira atu fo balansu entre sira nia direitu pesoal no kumprimentu dever nian ba Estadu. Nia fo avizu hasoru distrasaun husi era dijital, hodi husu ba estudante sira atu fo prioridade ba estuda istoria nasional duke uza teknolojia ba deit halimar. “Se imi la hatene imi-nia istoria, imi lakon imi-nia identidade,” hatete Jeneral Reformado Lere.
Asesor Prezidente afirma katak, komprensaun klean kona-ba funu rezistensia nian importante tebes ba jerasaun foun sira atu bele defende no lidera nasaun ho diak ba futuru neebe prosperu.
Nunee mos Administrador Postu administrativu Venilale, Jose Freitas Boavida, neebe louva Jeneral nia papel nuudar mentor no figura aman nian ba komunidade.
Jeneral Lere konklui hodi fo hanoin ba estudante sira katak lideransa hahu husi fuan no sustenta husi espíritu servisu nian.
Nia dezafia foinsae sira atu prepara an liu husi servisu makaas ho patriotizmu no kompromisu ho nasaun, hodi afirma katak Prezidensia Republika kontinua komprometidu atu kapaasita jerasaun lider foun sira neebe sei mantein valor husi Timor-Leste ida neebe demokratiku, soberanu no prosperu.
(eme)
