DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial AS, tanba komete krime omisidiu neglijensia.
Iha indisus sufisiente katak, iha loron 23 Maiu 2025 tuku 03:00 madrugada, arguidu hahu karega nia kareta transporte pasajeiru (BIS) iha Terminal Becora, Dili, inklui pasajeiru ida ho naran Marqueito Pinto Simões.
Depois tama iha kareta, vitima tuur iha banku kotuk sorin karuk. Arguidu hahu viajen ba Metinaro ho velocidade maizumenus 80 km/h.
Tuku 06:00 dader, durante viajen, arguidu sente dukur no hahu toba. Iha momentu neeba nia haree derepente kareta kamiaun Fuso ida para iha sorin estrada, neebe lori poste eletrisidade sira.
Bainhira hakfodak husi toba, arguidu koko muda kareta ba sorin loos, maibe la konsege evita kolizaun. Parte kotuk sorin karuk husi kareta bate ho poste eletrisidade sira neebe kamiaun lori, no estraga area neebe vitima tuur ba.
Tuir akontesimentu nee, vitima sofre kanek grave iha ulun no lakon raan barak, kanek sira nee mak sai hanesan kauza direta ba nia mate.
Arguidu halai nia kareta ho neglijensia, tanba kondus ho dukur, la atento no velosidade aas liu. Nia la observa kuidadu neebe tenke halo tuir dever jeral prudensia nian. Tanba la atento ba kareta seluk neebe para iha estrada, nia tenta halo manobra evita, maibe lakon kontrolu kareta no ikus mai mate. Hahalok nee hatudu katak arguidu la halo medida seguransa neebe nia bele no tenke halo, no simu risku husi rezultadu neebe bele preve maski la hakarak.
Arguidu hatene diak katak, nia hahalok nee proibidu no punidu tuir lei penal no kontraordenasaun neebe vigora iha Timor Leste.
Enkuadramentu Juridiku, tuir faktu sira nee, arguidu responsabiliza kriminal no kontraordenasional ba, kontraordenasaun rodoviaria ida, previstu iha artigu 25, artigu 129, artigu 130, artigu 144 husi dekretu lei numeru 6/2003 Kodigu Estrada.
Krime omisidiu ho neglijensia, previstu no punidu tuir artigu 140 husi Kodigu Penal, ho referensia ba artigu 25 husi Kodigu Estrada.
Hatan ba faktus nee, arguidu deklara katak, faktus neebe konsta iha akuzasaun loos hotu. Momentu neeba arguidu konduz kareta, maibe ho kondisaun dukur la kontrola aan no ikus mai rezulta soke, no vitima lakon vida.
Arguidu deklara, momentu akontese tiha, arguidu mos buka familia rejolve, no arguidu mos fo osan uitoan hodi halao vitima nia prosesu funebre.
Arguidu deklara, sente aprende tebes ba nia hahalok nee, maibe hahu husi akonteseementu to mai agora, arguidu la konduz kareta.
Aleinde nee, sasin Justinho Angelo deklara katak, antes nee sira rejolve ona tuir familia, tanba nee la iha ona problema.
Rona tiha arguidu no sasin, Tribunal husu atu tama ba iha alegasaun.
Iha alegasaun nee Prokurador Pedro Baptista husu Tribunal atu aplika pena Prizaun tinan ida, suspende tinan ida ba arguidu. No Ministeriu Publiku husu Tribunal atu aplika pena aksesoria proibisaun kondus veikulu motorizadu durante tinan ida, tuir artigu 84 no artigu 88 husi Kodigu Penal, tanba krime nee komete ho utilizasaun veikulu motorizadu.
MP mos husu Tribunal atu kondena arguidu selu konaba kontradisaun rodaviaria.
Aleinde nee, Defeza arguidu nian Defensor Publiku, Sergio Dias Quintas dehan, arguidu no familia sira rezolve ona, tanba nee husu Tribunal atu aplika pena justu.
Rona tiha alegasaun, Tribunal adia ba loron seluk hodi rona desizaun.
Prosesu nee prezide husi Juiz Kolektivu, Arjentino Nunes, Jose Gonsalves, Juiz estajiadu, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Sergio Dias Quintas.
(ter)
