DILI, STLTIMORLESTE.com – Bainhira implementa eleisaun poder lokal no munisipal, feto iha direitu atu kompete atu asume kargu nuudar deputada asembleia munisipal no seluk tan.
Feto Potensial Maria Amaral ba STL iha Kaikoli Tersa nee (16/06/2026) hatete, la kleur tan Governu sei realiza eleisaun poder lokal ou eleisaun munisipal, feto daudaun nee barak mak iha kapasidade neebe klean hodi kompete, laos tanba lei mak garante maibe sira iha duni kapasidade.
“Laos feto asume kargu nuudar deputada asembleia tanba lei mak garante feto maibe ita hatene katak daudaun nee feto sira iha munisipiu preparadu ho sira nia kapasidade neebe iha, tanba durante nee organizasaun feto sempre fo kapasitasaun ba feto no feto sira rasik mos kapasita aan liu husi atividade oin oin hodi prepara aan diak kompete iha elesaun Asembleia Munisipal, tanba nee feto iha direitu tomak kandidata aan hodi assume kargu nuudar deputada munisipal,” katak nia.
Nia hatete, SEI ho Parlamentu Nasional mos halo ona lei ida koalia konaba desentralizasaun administrativa poder lokal liu-liu eleisaun administrativa, eleisaun iha munisipiu sira, asembleia munisipal laos deit 30% maibe kuaze 40% feto inklina aan iha politika.
Nia enkoraja feto hotu nafatin hakat ba oin, maske sei hasoru bareira oin oin maibe nafatin hatudu aan ho kapasidade neebe iha hodi hatudu ba publiku no mane katak feto bele no bele duni.
Nunee mos Sekretaria Estadu ba Igualdade (SEI), Elvina Sousa enkoraja feto sira hotu nafatin hakat ba oin tanba lei rasik mos garante feto nia direitu katak feto ho mane iha direitu no obrigasaun neebe hanesan.
“Husu feto sira, liu liu feto sira iha munisipiu atu hakat ba oin, tempu nee mak ita boot sira nia laos ba hadau malu maibe bele hetan ita boot sira nia fatin sai deputada asembleia munisipal, sai sekretaria munisipiu neebe aban bainrua sei separa ho Sekretariu Estadu sira nuudar membru Governu iha autoridade munisipal sira,” dehan Sekretaria Estadu ba Igualdade.
Sekretaria Estadu hatete, foin daudaun SEI ho Deputada sira serbisu hamutuk halo tiha revizaun ba lei ida koalia konaba dezentralizasaun administrativa poder lokal liu liu eleisaun administrativa eleisaun iha Munisipiu sira, asembleia munisipal laos deit 30% maibe kuaze 40%.
“Ami ami halo revizaun kuaze 40% ona, neebe husi 40% ida mak bareira 30% ita hasai para tau ba 40% signifika posizaun iha hela, agora semak atu ba, tanba nee 40% feto iha asembleia munisipal, 40% feto sai deputada iha asembleia munisipal reprezenta povu iha asembleia munisipal, ida nee fila fali ba partidu no feto rasik atu prepara aan tanba sei iha neeba sei foti desizaun mesak, halo desizaun politika, halo lei sira hodi bele regula ita nia munisipiu, neebe buat neebe halo impkatu direita ba povu sira,” katak nia.
Nia hatete, ida nee sai hanesan eskada ba feto sira ba oin, ho ida laos deit feto iha parlamentu nasional mak kuaze 40% maibe too asembleia munisipal feto assume 40% iha munisipal.
Alende nee Parlamentu Nasional halo revizaun ba pakote lei dezentralizasaun no eleisaun esforsu nee fortalese poder lokal no garante feto asume kuaze 40% ou liu kargu iha politika, no nivel lideransa munisipal ida nee hametin igualdaade jeneru iha Governasaun.
(eme)
