DILI, STLTIMORLESTE.com – Media sosial nee fatin atu buka imformasaun, laos fatin atu insulta malu, tanba nee husu ema idak-idak presiza uza ho responsablidade no etika, laos uza hodi tolok malu.
Feto Potensial Maria Amaral ba STL Sesta (31/07/2026) hatete, media sosial nee fatin ida neebe halo ema bele buka informasaun iha laran, no ajuda estudante sira oinsa buka materia ruma hodi hasae tan kapasidade, maibe dala barak ema uza sala media sosial nee hodi tolok malu no insulta malu.
“Dala ruma uza sala media sosial nee hodi lekar problema no tolok malu, insulta lider sira, ida nee ezemplu neebe la diak iha publiku. Tanba nee, husu ita hotu uza media ho responsablidade ho etika moral, karik iha buat ruma la monu laran bolu malu koalia ba malu, laos uza hodi tolok, insulta malu,” dehan nia.
Nia hatete, iha problema ruma hatoo husi media sosial ida nee laos atu rezolve problema, maibe nee atu hanaruk problema, no balun mos uza hodi insulta lider rezistensia sira, balun uza media sosial hodi tolok no trata Nai Lulik, lider rezistensia sira, nee ema neebe uza media sosial laos ho responsabilidade.
Ema neebe uza media sosial ho responsabilidade mak ema neebe utiliza media hodi buka informasaun bele fo benefisiu ba aan hodi hasae kapasidade no skil, tanba media sosial fatin atu fahe informasaun neebe los no kredivel.
“Uza media sosial ho diak, labele uza media sosial hodi insulta malu, no uza media sosial hodi fo sai informasaun neebe los, kredivel, fahe informasaun neebe los ba publiku, laos fahe informasaun hoax no insulta malu,” katak Maria.
Nunee mos Amito Qonusere Araujo hanesan mos Tekniku Espesializada Komunikasaun Sosial iha Sekretaria Estadu Komunikasaun Sosial (SECOMS) husu joven sira atu utiliza media sosial ho responsabilidade no labele uza media hodi tolok no insulta malu satan insulta lider rezistensia sira.
Maibe husu joven sira atu hasae kapasidade liu husi formasaun sira hodi hasae koinesementu nunee bele partisipa iha dezenvolvimentu nasional.
“Nuudar foinsae, keta haluhan atu partisipa iha formasaun oin oin, tanba liu husi formasaun mak hatudu ita nia dalan diak ba futuru, atu partisipa iha prosesu dezenvolvimentu nasional. Se ita halimar ba sosial mídia deit, la aproveita ho didiak, ita rasik mak sei baku rentos mais buat hotu liu ona.” dehan Amito.
Nunee mos Sekretariu Estadu Komunikasaun Sosial (SEKOMS), Expedito Loro Dias Ximenes husu sidadaun hotu uza media sosial ho responsablidade no saudavel.
“Mensajen ba Timor hotu, liu-liu ba sira neebe uza media sosial husi plataforma oi-oin neebe iha atu bele uza media sosial ho etika ho moral ho responsabilidade, nunee bele kria ambiente saudavel iha ita nia rain, kria paz ho estabilidade nunee prosessu dezenvolvimentu nasional lao hodi lori prosperidade boot ba povu ho nasaun Timor Leste,” katak nia.
Iha biban nee membru Governu nee husu ba sidadaun hotu neebe uza media sosial uza ho etika, no moral ho responsablidade labele uza media sosial hodi insulta lider sira.
(eme)
