DILI, STLTIMORLESTE.com – Komando FALINTIL-Forsa Defeza Timor Leste (F-FDTL) hamutuk Ministeriu Defeza realiza serimonia hasae Bandeira Nasionál semana dahuluk fulan Agostu nian, no nuudar fulan ida neebe ezijente tebes ba Instituisaun F-FDTL.
Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hatete, iha serimonia hasae Bandeira Nasional ida nee marka inísiu ba fulan ida tan servisu ba nasaun no povu ida nee.
“Hau dirije ba ita boot sira hotu ho konsiensia katak fulan Agostu aprezenta aan nuudar fulan ida neebe ezijente tebes ba ita nia instituisaun,” hatete Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” ba jornalista sira liu nia diskursu iha ambitu serimonia hasae Bandeira Nasional iha Kuartel Jeneral F-FDTL Fatuhada, Dili, Segunda (03/08/2026).
Nia dehan, kalendáriu oin mai halibur hamutuk, iha tempu badak nia laran, kompromisu sira ho natureza distinta, maibe ho relevánsia hanesan eventu internasional sira hanesan Dili maratona no simeira ba dezenvolvimentu siénsia, neebe projeta imazen Timor Leste nian. No serimonia sira ho natureza nasional eminente, hanesan komemorasaun sira loron 20 no 30 fulan Agostu nian.
“Fulan Agostu nian neebe bolu ita atu hanoin no selebra ita nia povu nia identidade koletiva. Haree ba konsentrasaun responsabilidade sira nee, hau apela ba esforsu hotu neebe redobradu iha koordenasaun entre orgaun no unidade sira hotu neebe envolve, atu nunee eventu ida-idak akontese ho rigor, dixiplina no exelensia neebe sai hanesan marka Forsas Armadas nian,” nia tenik.
Konaba loron 20 fulan Agostu nee, Tenente Jeneral Falur Rate Laek hakarak atu foka ho enfaze partikular. Tanba nee, Loron FALINTIL nian sei selebra iha Matebian.
“Ezije ita nia dedikasaun eskluziva no komprometimentu tomak. Ba sira hotu neebe halo parte iha Komisaun Organizadora, no ba sira hotu neebe sei simu knaar, hau husu atu ezekuta ho rigor no sentidu misaun nian neebe okaziaun ezije. Nee laos serimonia ida hanesan sira seluk,nee konaba fo onra ba ema hotu neebe saran an ho sakrifisiu atu ohin ita bele livremente hasae Bandeira ida nee,” nia informa.
Nia deklara, ba eroi konhesidu no eroi anonimu sira hotu, neebe istória dala ruma la konsege prezerva sira nia naran, maibe sira nia dedikasaun sei nunka haluha, neebe mehi konaba Timor Leste ida neebe diak liu sein iha oportunidade atu haree.
“Hau dirije mensajen ida nee ba ita hotu, hirak neebe ohin loron serví F-FDTL no Ministeriu Defeza, servisu labele sura kolen atu halo sira nia mehi sai realidade. Ida nee mak signifikadu klean husi ita nia dever atu fo onra, serbisu no dixiplina loron-loron nian, ba buat neebe mak ema seluk selu ho sira nia moris rasik,” nia hatutan.
Nia koalia, aproveita mos semana dahuluk fulan Agostu ida nee hodi formaliza promosaun kadetes timoroan sira neebe kompleta ho susesu Akademia Militár iha Indonezia (AKMIL) neebe sira nia serimonia graduasaun halao iha Jakarta iha loron 22 fulan Julhu. Sira nee mak Timor-oan dahuluk neebee frekuenta AKMIL, rezultadu neebe hetan nuudar rezultadu husi kooperasaun militar entre F-FDTL no Ezérsitu Nasionál Indonézia (TNI), no mos kompromisu tekniku-militar neebe sustenta parseria nee.
Nia dehan, serimonia ida nee ho objetivu presizamente aliña formasaun neebe hetan iha instituisaun neeba ho kategoria korrespondente iha F-FDTL nian hodi halo promosaun.
“Ba graduadu nain haat, hau oferese liafuan ho meritu rekonesidu, ba Angkatan Darat, Keyduli R. Graça de Jesus Carvalho no Giovanino Fátima dos Santos Alves; ba Angkatan Udara, Experi Jezinho Gomes Raúl; no ba Angkatan Laut, Lucas Mau Buti Araújo dos Santos. Hotu-hotu hetan rezultadu ezemplar no sei kontinua iha tempu badak ba espesializasaun ba sira nia ramu ida-idak. Ita-boot sira nia dedikasaun fo onra ba ami hotu, no fo onra ba farda neebe uza ohin,” katak nia.
Nia sublina katak, investimentu Rekursu Umanu iha Forsa Armada sai nafatin primordial. “Ita tenke kontinua aproveita apoiu husi ita nia parseiru dezenvolvimentu sira, maibe internalmente, dezenvolve ita nia inisiativa rasik, partikularmente iha kuadru Asaun Uniformizasaun nian neebe reforsa koezaun no identidade institusionál. Hein katak fulan Agostu ida nee halo ita unidu, dixiplinadu, no merese memoria neebe ita tenke fo onra,” nia afirma.
Alende nee iha serimonia hasae Bandeira Nasionál semana dahuluk fulan Agostu nee iha militar nain nain haat (4) hira nee juramentu ba Bandeira, impozisaun Boina no promosaun ba postu Alferes nian tolu no Sub-Tenente ida.
Entretantu iha serimonia hasae Bandeira Nasional nee partisipa husi Membru F-FDTL no Funsionariu Ministeriu Defeza, AMN no IDN.
(jen)
