DILI, STLTIMORLESTE.com – Prezidente Repúblika (PR), José Ramos-Horta husu atu valoriza feto soru-na’in sira, garante folin tais ne’ebé justu no hametin sustentabilidade patrimóniu kulturál Timor-Leste nian.
Prezidente Repúblika hato’o mensajen ne’e iha abertura Fórum Nasionál Tais ba Dahaat, ho tema “Prezervasaun, Empoderamentu no Sustentabilidade”, ne’ebé organiza husi Rede Soru-Na’in iha Díli, 13 Outubru 2026.
Ramos-Horta afirma katak, tais la’ós de’it hena tradisionál, maibé arkivu moris ida ne’ebé reprezenta istória, koñesimentu tradisionál no identidade koletiva povu Timor-Leste nian.
Nia esplika katak, soru-na’in sira-nia koñesimentu, abilidade no kriatividade importante tebes atu prezerva patrimóniu kulturál ne’e ba jerasaun tuirmai.
Prezidente mós hato’o katak, tais hetan rekoñesimentu UNESCO iha 2021, nu’udar patrimóniu kulturál imateriál ne’ebé presiza salvaguarda urjente.
Nia subliña katak, rekoñesimentu internasionál ne’e lori responsabilidade ba Timor-Leste atu proteje tais liuhusi asaun konkreta, partisipasaun komunidade no transmisaun koñesimentu ba jerasaun foun.
Ramos-Horta enfatiza katak, feto soru-na’in sira la’ós de’it guardiaun tradisaun, maibé mós traballadór kualifikadu no empreendedór sira ne’ebé kontribui ba ekonomia lokál no sustentu família.
Nia mós husu atu garante folin tais ne’ebé justu, tanba folin ne’e tenke reflete tempu, esforsu, koñesimentu no kriatividade ne’ebé soru-na’in sira investe iha produsaun.
Prezidente hateten katak, komersializasaun tais tenke respeita autentisidade kulturál, orijen no koñesimentu tradisionál, hodi asegura katak benefísiu ekonómiku to’o ba feto no komunidade sira.
Nia fó rekoñesimentu ba Rede Soru-Na’in, rede nasionál ne’ebé halibur feto soru-na’in sira husi munisípiu 14, inklui Rejiaun Administrativa Espesiál Oé-Cusse Ambeno.
Ramos-Horta hein katak fórum ne’e bele lori kompromisu klaru, parseria metin no medida konkretu atu proteje patrimóniu kulturál, fó kbiit ba feto soru-na’in sira no hametin sustentabilidade setór tais nian.
Iha momentu ne’e, Prezidente Repúblika deklara ofisialmente abertura Fórum Nasionál Tais ba Dahaat Rede Soru-Na’in nian.
(eme)
