DÍLI, STLTIMORLESTE.com – Ekipa voleibol mane Aby Travel konsege vitória 3–0 hasoru Daçuate iha Liga Voleibol Timor-Leste Primeira Divizaun, Époka 2026.
Partida ne’e hala’o iha Pavilhaun Ginásio Desportu Dili, tersa-feira (20/10/2026), ho Aby Travel domina set rua dahuluk, maibé hetan rezisténsia maka’as iha set datoluk.
Iha set dahuluk, Aby Travel hatudu dominasaun hodi manán ho pontu 25–16. Ekipa ne’e kontinua nia superioridade iha set daruak ho vitória 25–15, hodi lidera 2–0.
Maski lakon set rua dahuluk, Daçuate la entrega an no kontinua luta maka’as iha set datoluk, hodi obriga Aby Travel atu hasoru disputa ne’ebé intensa.
Ekipa rua troka malu vantagem pontu durante set datoluk, ho rezultadu ne’ebé dala barak hanesan, to’o atinje pontu 25–25.
Maibé, Aby Travel konsege aproveita momentu ikus hodi aumenta pontu no taka set datoluk ho rezultadu 28–26, nune’e garante vitória 3–0 hasoru Daçuate.
Durante partida, apoiantes husi ekipa rua anima pavilhaun ho gritu no apoiu maka’as, hodi aumenta entuziazmu no atmosfera kompetitiva iha jogu ne’e.
Prezensa espetadór sira hatudu katak kompetisaun voleibol kontinua dada atensaun husi komunidade desportiva iha Timor-Leste.
Vitória ne’e sai rezultadu pozitivu ba Aby Travel atu kontinua nia kampaña iha Liga Voleibol Timor-Leste Primeira Divizaun, Époka 2026.
(leo)
