DILI, STLTIMORLESTE.com — Governu Timor-Leste kontinua fó prioridade ba finalizasaun negosiasaun kona-ba dezenvolvimentu kampu petróleu Greater Sunrise no preparasaun lisensiamentu ba esplorasaun minerál, nu’udar esforsu atu dezenvolve setór rekursu naturál no diversifika ekonomia nasionál.
Ministru Petróleu no Rekursu Minerais (MPRM), Francisco da Costa Monteiro, hato’o informasaun ne’e ba jornalista sira iha Palásiu Governu, Dili, kuarta-feira (21/10/2026), hafoin partisipa enkontru Konsellu Ministrus (KM).
Ministru Francisco da Costa Monteiro esplika katak, ida-ne’ebé sai prioridade ba tinan 2027 mak finalizasaun negosiasaun no akordu ho Governu Austrália no kompanhia sira ne’ebé envolve iha dezenvolvimentu kampu petróleu Greater Sunrise.
Esforsu ne’e importante atu avansa prosesu dezenvolvimentu kampu petróleu ne’e, ne’ebé bele kontribui ba futuru setór petróleu Timor-Leste.
Aleinde ne’e, Governu kontinua halo diskusaun kona-ba akordu no entendimentu sira ne’ebé presiza finaliza, atu garante prosesu dezenvolvimentu rekursu petróleu lao tuir dalan ne’ebé planeia ona.
Governu Prepara Lisensiamentu Esplorasaun Minerál
Iha setór minerál, Ministru Francisco da Costa Monteiro informa katak Governu hala’o ona prosesu konkorsu internasionál atu atrai kompanhia sira ne’ebé iha interese atu investe iha esplorasaun rekursu minerais iha Timor-Leste.
Tuir prosesu ne’e, Governu sei kontinua prepara etapa tuirmai ba lisensiamentu, atu kompanhia sira ne’ebé kumpre kritériu no kondisaun aplikável bele hala’o atividade esplorasaun tuir lejizlasaun ne’ebé vigora.
Lisensiamentu ne’e iha objetivu atu kria oportunidade ba investimentu iha setór minerál, no iha tempu hanesan promove dezenvolvimentu ekonómiku nasionál.
Governu konsidera katak dezenvolvimentu setór minerál bele sai komplementu ba setór petróleu, hodi aumenta oportunidade investimentu no aproveita rekursu naturál Timor-Leste ba interese nasionál.
(jos)
