DILI, STLTIMORLESTE.com — Ministériu Saúde kontinua prepara infraestrutura no ekipamentu ospitál, planeia instalasaun sistema oksijéniu no promove digitalizasaun servisu farmásia, enkuantu Governu aprova rejime promosaun estraordinária ba profisionál saúde na’in 1.874 iha Administrasaun Públika ba tinan 2026.
Ministra Saúde, Elia A. A. dos Reis Amaral, hato’o informasaun ne’e ba jornalista sira iha Palásiu Governu, Dili, kuarta-feira (21/10/2026), no esplika katak prioridade Ministériu nian inklui hadi’a infraestrutura ospitál, garante disponibilidade ekipamentu no mobília, no hametin kapasidade rekursu umanu iha Sistema Nasionál Saúde.
Iha área infraestrutura, Ministériu Saúde sei kontinua prepara ospitál sira ho ekipamentu no mobília ne’ebé presiza atu suporta prestasaun servisu médiku no hadi’a atendimentu ba pasiente.
Ministériu mós planeia instala sistema produsaun oksijéniu liuhosi teknologia PSA (Pressure Swing Adsorption) iha ospitál sira, inklui iha andár ne’ebé presiza, atu asegura fornecimentu oksijéniu ba nesesidade atendimentu médiku.
Iha área rekursu umanu, Governu aprova projetu Dekretu-Lei kona-ba rejime promosaun estraordinária ba profisionál saúde sira iha Administrasaun Públika ba tinan 2026, ho vaga hamutuk 1.874.
Proposta ne’e aprezenta husi Ministra Saúde iha reuniaun Konsellu Ministrus. Vaga hirak-ne’e destina ba profisionál saúde sira ne’ebé seidauk hetan promosaun iha tinan 2025, inklui médiku, enfermeiru, parteira no tékniku sira iha área diagnóstiku, terapéutika no saúde públika.
Tuir informasaun ne’ebé ministra hato’o, promosaun estraordinária ne’e sei produz efeitu husi 1 Jullu 2026. Medida ne’e iha objetivu atu valoriza profisionál saúde, aumenta motivasaun servisu no apoia dezenvolvimentu karreira iha setór saúde.
Aleinde promosaun, Ministériu Saúde mós foka ba distribuisaun profisionál espesializadu, inklui farmaséutiku sira, ba ospitál referál no Hospital Nasionál, atu responde ba nesesidade servisu saúde iha nivel referénsia.
Iha parte seluk, digitalizasaun servisu farmásia sai mós prioridade, ho objetivu atu integra sistema informasaun, hadi’a jestaun no fasilita organizasaun servisu farmaséutiku.
Maski nune’e, implementasaun medida sira-ne’e sei depende ba preparasaun infraestrutura, disponibilidade ekipamentu no rekursu umanu, no mós mekanizmu administrativu ne’ebé presiza atu garante prestasaun servisu saúde ne’ebé kontinua no asesível ba populasaun.
(jos)
