DILI, STLTIMORLESTE.com – Tribunal Judisiál Primeira Instánsia Díli (TJPID) kontinua julgamentu kazu tentativa omisídiu ho arma branka hasoru Denilson Sousa Ximenes, ho arguidu inisiál OdJM, iha 21 Outubru 2026.
Ministériu Públiku (MP) propoin atu arguidu OdJM hetan liberdade husi akuzasaun, maibé kontinua iha fatin internamentu apropriadu atu hetan tratamentu espesial, bazeia ba relatóriu médiku kona-ba nia kondisaun saúde mentál.
Prokuradór Bartolomeo de Araújo hateten katak, relatóriu médiku hatudu arguidu sofre moras iha ulun. Tanba ne’e, MP konsidera katak arguidu presiza tratamentu espesial, no la propoin atu kondena nia.
MP mós rekomenda katak, se sistema prizaun la iha fatin apropriadu ba internamentu, tribunál bele konsidera Laklubar nu’udar fatin ba kontinuidade tratamentu arguidu nian.
Defeza, ne’ebé reprezenta husi Manuel Amaral, konkorda katak arguidu presiza hetan tratamentu iha fatin separadu husi dadur sira seluk, tanba nia kondisaun saúde mentál.
Juíza Ana Paula Fonseca, hamutuk ho juíza kolega Ercília de Jesus no José Maria, prezide julgamentu ne’e. Hafoin rona alegasaun husi MP no defeza, tribunál adia audiénsia ba loron seluk atu fó desizaun.
Tuir akuzasaun, kazu ne’e akontese iha 19 Novembru 2025, tuku 12:00, iha aldeia Niciulun, suku Carahili, postu administrativu Remexio, munisípiu Aileu.
Iha momentu ne’ebá, Denilson lori nia avó fila husi Sentru Saúde Remexio. Arguidu bolu nia atu hein, depois husu bee atu hemu. Hafoin hemu bee, arguidu ameasa atu sona Denilson.
Tuir akuzasaun, arguidu hasai tudik husi nia kanotak no sona Denilson iha parte karuk hirus-matan, besik kalabiku. Arguidu tenta sona tan, maibé Denilson konsege halai, no sasin ida haree akontesimentu ne’e.
Iha julgamentu, arguidu konfesa katak nia mak sona Denilson ho tudik. Nia esplika katak antes akontesimentu ne’e, nia konsumu aimoruk no iha istória tratamentu saúde mentál iha Ospitál Psikiatria Laklubar.
Denilson deklara katak nia la eskola hamutuk ho arguidu no sira la koñese malu, maski inan-aman sira koñese malu. Nia mós relata katak arguidu nia inan-aman vizita nia durante nia hela iha ospitál.
Iha audiénsia antes ne’e, MP husu atu rona mós médiku espesialista psikiatria atu klarifika kondisaun arguidu nian. Relatóriu médiku ne’e sai importante ba tribunál atu avalia medida apropriada.
Tribunál seidauk fó desizaun final kona-ba kazu ne’e. Audiénsia adia ba loron seluk atu kontinua prosesu tuir lei..
(ter)
