BAUCAU, STLTIMORLESTE.com – Sekretariadu Tékniku Administrasaun Eleitorál (STAE) Munisípiu Baucau seleksiona ona kandidatu brigadista na’in 590 ne’ebé pasa faze selesaun dokumentus hosi totál kandidatu na’in 808, atu disputa vaga 150 ba preparasaun Eleisaun Prezidensiál 2027.
Diretór STAE Munisípiu Baucau, Natividade Freitas Guterres, informa ba STL iha nia knaar-fatin, Vila Nova, Baucau, kuarta-feira (21/10/2026), katak rekrutamentu brigadista sira ba Eleisaun Prezidensiál 2027 liu ona faze selesaun dokumentus no kandidatu sira ne’ebé pasa faze ida-ne’e sei kontinua ba teste eskrita iha fulan Novembru 2026.
“Totál ema ne’ebé submete dokumentus ba vaga brigadista hamutuk 808, mane 355 no feto 453. Totál ne’ebé la pasa selesaun dokumentus hamutuk 218, mane 105 no feto 113, enkuantu ne’ebé pasa selesaun dokumentus hamutuk 590, mane 250 no feto 340,” Natividade informa.
Nia esplika katak kandidatu na’in 218 la pasa faze selesaun dokumentus tanba balun la aprezenta dokumentu tuir rekizitu, inklui diploma ka sertifikadu eskola sekundária, kartaun eleitorál no dokumentu relevante seluk.
Natividade hateten katak STAE Munisípiu Baucau presiza brigadista na’in 150 de’it ba Eleisaun Prezidensiál 2027. Tanba ne’e, kandidatu na’in 590 ne’ebé pasa selesaun dokumentus sei kontinua kompetisaun liuhosi teste eskrita ne’ebé sei realiza iha fulan Novembru 2026.
Tuir nia, brigadista sira ne’ebé hetan seleksaun sei iha responsabilidade atu hala’o edukasaun eleitorál iha nivel suku no halo koordenasaun ho STAE no autoridade suku sira.
“Sira-nia servisu mak atu halo edukasaun eleitorál iha nivel suku. Sira mós sei halo koordenasaun ho STAE no suku, tanba sira ne’e mak sei sai manorin ba pesoál iha kada sentru votasaun, no iha loron votasaun sira sei sai prezidente sentru votasaun,” Natividade esplika.
Iha oportunidade ne’e, Diretór STAE Munisípiu Baucau husu kandidatu sira atu kontinua aprende no prepara an ho di’ak, hodi partisipa iha teste eskrita iha fulan Novembru no kontribui ba susesu Eleisaun Prezidensiál 2027.
(tom)
