DILI, STLTIMORLESTE.com — Pe. Paul Kerans, SVD afirma katak, ema hotu presiza fiar ba Maromak no kumpre Nia mandamentu, liuhusi servisu ho fidelidade no responsabilidade ba ema seluk.
Pe. Paul hato’o mensajen ne’e iha nia refleksaun loroloron nian ba STL, Kuarta-feira (21/10), bazeia ba Evanjellu Lucas 12:39-48.
Iha refleksaun ne’e, nia esplika katak, Jesus bolu ninia dixípulu sira atu sai atan ne’ebé fiel no matenek, ne’ebé prontu atu tau matan ba nesesidade ema seluk.
“Ita hotu atan ba Na’i ida de’it, ne’ebé signifika katak ita ida labele koloka ita-nia an nu’udar na’i ba ema seluk,” Pe. Paul dehan.
Nia hateten katak, maski relasaun na’i ho atan la’ós buat ne’ebé komún iha sosiedade ohin loron, mensajen Jesus nian nafatin iha valór ba dixípulu sira iha tempu hotu.
Tuir Pe. Paul, Maromak bolu ema hotu atu sai atan ne’ebé laran-metin no matenek, hodi responde ba nesesidade membru hotu-hotu iha komunidade.
Nia mós enfatiza katak, ema hotu-hotu kria tuir Maromak nia imajen no hanesan, tanba ne’e, ema ida-idak iha responsabilidade atu tau matan ba malu.
Nia kontinua katak, fidelidade ba Maromak tenke manifesta iha asaun loroloron, liuhusi servisu ho responsabilidade, domin no kuidadu ba ema sira ne’ebé hale’u ita.
Iha nia remata, Pe. Paul konvida fiéis sira atu moris tuir bolun Maromak nian, hodi sai instrumentu ba Nia kuidadu no hetan ksolok ne’ebé Jesus promete iha Evanjellu.
(eme)
