DILI, STLTIMORLESTE.com – Autoridade Munisípiu Dili (AMD) husu komunidade atu denúnsia krime bainhira haree ka hatene akontesimentu kriminál.
Prezidente Autoridade Munisípiu Dili, Francisco dos Santos apela ba sidadaun hotu atu kolabora ho PNTL hodi prevene no kombate krime iha Dili.
Nia hateten katak, seguransa públika la’ós responsabilidade polísia nian de’it, maibé presiza mós partisipasaun ativa husi komunidade.
“Polísia labele servisu mesak. Komunidade tenke kontribui, liuhusi fó informasaun bainhira haree situasaun kriminál,”hatete Prezidente Autoridade Munisípiu Dili, Francisco dos Santos ba jornalista STL iha PN, Kuarta (21/10/2026).
Francisco dehan katak, sidadaun ne’ebé haree krime akontese labele nonook, maibé tenke informa kedas ba polísia.
Nia husu komunidade atu relata kazu sira ba PNTL ka eskadra polísia ne’ebé besik, atu autoridade bele halo investigasaun.
Prezidente Autoridade Munisípiu Dili mós asegura katak polísia sei proteje identidade informadór sira, atu sira bele fó informasaun ho konfiansa.
Nia subliña katak, kolaborasaun entre komunidade no PNTL importante tebes hodi hametin seguransa no prevene krime iha kapitál.
Antes nee Polísia Nasionál Timor-Leste (PNTL) Liu husi Komando PNTL Munisipiu Dili, deteta ona suspeitu ho inisiál M, ne’ebé alegadamente envolve iha kazu baku motorista no tuda kareta saneamentu iha Rai Kotu, Tasi Tolu, Domingu kalan.
Komandante PNTL Munisípiu Díli, Komisáriu Asistente Polísia Orlando Gomes hateten katak, kazu ne’e akontese iha oras 00:00, bainhira grupu joven ida tur hela besik Pertamina, Rai Kotu.
Nia esplika katak, grupu joven ne’e hahú tuda kareta ida, antes tuda kareta saneamentu ne’ebé lori fo’er ba fatin soe iha Tibar.
“Grupu ne’e mós baku motorista, no vítima relata kedas akontesimentu ne’e ba Ita nia PNTL iha Dom Aleixo,”hatete Komandante PNTL Munisípiu Díli,” nia esplika.
Nia informa, depois hetan informasaun, patrulla polísia ba kedas fatin akontesimentu atu halo intervensaun no prevene situasaun ne’e sai grave.
“Vítima aprezenta ona keixa, no ita foti ona deklarasaun vítima nian, inklui deklarasaun husi sasin balun ne’ebé haree akontesimentu,” nia informa.
Orlando Gomes hateten katak, ekipa investigasaun kontinua halo investigasaun, inklui haree imajen CCTV, atu identifika ema sira ne’ebé envolve iha kazu ne’e.
Nia konfirma katak, polísia hetan ona informasaun kona-ba suspeitu ho inisiál M, no aprezenta ona pedidu mandadu kapturasaun ba autoridade kompetente.
“Ita kontinua hala’o investigasaun atu klarifika faktu sira no determina responsabilidade husi ema sira ne’ebé suspeita envolve iha kazu ne’e,” nia afirma.
(jen)
