DILI, STLTIMORLESTE.com – Komando Jerál Polísia Nasionál Timor-Leste (PNTL) prepara ona planu seguransa ne’ebé sei implementa iha munisípiu sira durante Loron Finadu, hodi prevene krime no konflitu.
Komandante Operasaun PNTL, Komisáriu Asistente Polísia Armando Monteiro hatete katak, planu ne’e sei distribui ba komandu munisipál sira atu implementa iha territóriu sira.
Nia hato’o informasaun ne’e ba jornalista sira iha Komandu Jerál PNTL, Dili, kinta-feira (29/10/2026).
“Komandu Jerál PNTL, liuhusi Komandu Operasionál, prepara ona planu seguransa. Agora hein de’it distribui ba komandu munisipál sira atu implementa,” hatete Armando Monteiro.
Nia esplika katak, operasaun ne’e sei envolve unidade espesiál PNTL, liuliu iha munisípiu sira ne’ebé identifika hanesan área ho risku krime.
Armando husu sidadaun sira atu kolabora ho autoridade seguransa, hodi garante atividade relijioza no movimentu komunidade durante Loron Finadu lao ho dame.
Nia mós apela ba komunidade no órgaun komunikasaun sira atu hametin ambiente dame no solidariedade durante loron importante ne’e.
Komandante Operasaun PNTL enfatiza katak, autoridade seguransa sei la tolera aktu krime. Ema ne’ebé viola lei sei responde tuir lei ne’ebé vigora.
Iha parte seluk, Komandante PNTL Munisípiu Dili, Komisáriu Asistente Polísia Orlando Gomes, hatete katak komandu munisipál simu ona orientasaun husi Komandu Jerál kona-ba planu seguransa ba Loron Matebian.
“Ita prepara ona. Agora hein implementasaun atu koloka membru polísia sira iha semitériu sira iha Munisípiu Dili,” Orlando Gomes informa.
Nia esplika katak, PNTL identifika ona semitériu balun ne’ebé konsidera iha risku konflitu, atu koloka membru polísia iha fatin hirak-ne’e.
Planu seguransa ne’e sei envolve Unidade Espesiál Polísia (UEP), Unidade Polísia Marítima (UPM) no membru F-FDTL atu apoia operasaun.
“Sira tenke fó apoiu atu garante seguransa durante Loron Finadu, nune’e atividade sira bele lao ho di’ak,” nia dehan.
Orlando Gomes hatutan katak, kolokasaun membru polísia sei bazeia ba avaliasaun risku, hodi prevene konflitu durante Loron Matebian.
Nunee mos Akademista Universidade Nasionál Timor Lorosa’e (UNTL), José Costantino Ximenes, mós husu PNTL no F-FDTL atu garante seguransa durante Loron Matebian.
“Loron Matebian besik ona. Tanba ne’e, husu PNTL no F-FDTL atu garante seguransa no prevene konflitu ne’ebé bele hamosu kanek no mate,” nia koalia.
José Costantino alerta katak, ema balun bele aproveita loron ne’e atu hemu tua no provoka malu, ne’ebé bele hamosu konflitu no kauza vítima.
Tanba ne’e, nia husu komunidade atu evita provokasaun, mantém dame no koopera ho autoridade seguransa, hodi asegura selebrasaun Loron Finadu lao ho hakmatek.
(jen)
