LIQUIÇÁ, STLTIMORLESTE.com – Liu husi Komunikadu Impresa ne’ebe STL asesu iha media PNTL katak, Forsa Konjunta Timor-Leste kaptura joven na’in rua ne’ebé transporta Coca-Cola kaixa 30, suspeita importa ilegalmente husi Indonézia.
Operasaun ne’e hala’o iha área Maubara, Suku Vaviquina, Postu Administrativu Maubara, Munisípiu Liquiçá, iha oras 06h00 dadeer, Kinta-feira (29/10/2026).
Autoridade Aduaneira (AA) lidera operasaun ne’e, ho objetivu atu prevene no kombate kontrabandu, no asegura kumprimentu ba lei aduaneira iha Timor-Leste.
Durante operasaun auto-stop, ekipa konjunta para no halo verifikasaun ba veíkulu transporte públiku no privadu.
Ekipa detekta Coca-Cola kaixa 30 iha veíkulu Honda Fit ho matríkula B.29.755 TL, ne’ebé mai husi Munisípiu Bobonaru ho destinasaun ba Dili.
Joven na’in rua ne’e, ho inisiál JAR no MPG, hetan kaptura tanba suspeita transporta bebida asukarada ne’e sem dokumentu importasaun legál.
Hafoin verifikasaun, ekipa konjunta apreende sasán hirak-ne’e hanesan evidénsia ba prosesu investigasaun.
Suspeitu na’in rua no sasán apreendidu entrega ba Komandu PNTL Munisípiu Liquiçá atu kontinua prosesu legál.
Kazu ne’e rejista ho númeru NUC: 0058/26.LIMBR, relasiona ho suspeita importasaun Coca-Cola ne’ebé la tuir prosedimentu aduaneiru.
Operasaun konjunta ne’e envolve Autoridade Aduaneira (AA), Diresaun Servisu Investigasaun Kriminál (DSIK), no Diresaun Servisu Informasaun Polísia (DSIP) husi PNTL.
Entertatu Instituisaun seluk ne’ebé partisipa mak Polísia Sientífika Investigasaun Kriminál (PCIC), Servisu Nasionál Intelijénsia Estratéjiku (SNIE), membru D2 husi F-FDTL no S2 husi Unidade FALINTIL.
Autoridade kompetente sei kontinua prosesu tuir lei ne’ebé vigora, ho respeitu ba prinsipiu prezunsaun inocénsia ba suspeitu sira.
Forsa Konjunta Timor-Leste afirma sei kontinua hametin koordenasaun entre instituisaun sira, liuhusi fiskalizasaun no kontrolu iha fronteira no fatin estratéjiku sira, hodi prevene kontrabandu no asegura kumprimentu ba regulamentu aduaneiru.
(jen)
