DÍLI, STLTIMORLESTE.com – Sentru Saúde Comoro rejista kazu asidente tráfiku 26 durante loron feriadu 1 to’o 3 Novembru 2026.
Xefe Sentru Saúde Comoro, Emilia Ayati de Souza informa katak,
iha loron 1 Novembru, sentru rejista pasiente hamutuk 115. Husi total ne’e, pasiente na’in 10 halo observasaun, na’in 4 transfere no kazu asidente tráfiku rua.
Iha loron hanesan, servisu maternidade atende inan parturiente na’in 7 no kazu na’in 3 refere ba Hospital Nasionál Guido Valadares (HNGV). Aleinde ne’e, sentru halo vasinasaun ba labarik na’in 6.
Iha loron 2 Novembru, total pasiente ne’ebé hetan atendimentu hamutuk 189. Husi total ne’e, pasiente na’in 18 halo observasaun no na’in 7 transfere ba HNGV.
Iha loron ne’e, rejista kazu asidente tráfiku na’in 9, inklui pasiente na’in 3 ne’ebé hetan kanek grave no transfere ba HNGV.
Ba servisu maternidade, sentru atende inan parturiente na’in 5 ho partu normal, maibé kazu na’in 2 refere ba HNGV. Vasinasaun mós fó ba bebé na’in 5.
Enkuantu iha loron 3 Novembru, sentru rejista pasiente hamutuk 182. Husi total ne’e, pasiente na’in 12 halo observasaun no na’in 2 transfere ba HNGV.
Iha loron ne’e, rejista kazu asidente tráfiku na’in 15. Husi total ne’e, pasiente na’in 1 hetan kanek grave no transfere ba HNGV, enkuantu na’in 14 seluk hetan tratamentu iha Sentru Saúde Comoro.
Iha servisu maternidade, sentru atende inan parturiente no kazu na’in 2 refere ba HNGV. Vasinasaun ba bebé mós atinji na’in 4.
Emilia Ayati de Souza esplika katak, pasiente sira ne’ebé nia kondisaun la grave bele hetan tratamentu iha Sentru Saúde Comoro, enkuantu pasiente sira ne’ebé grave tenke transfere ba HNGV.
“Iha loron 2, husi kazu asidente tráfiku na’in 9, na’in 3 mak grave no refere ba HNGV. Iha loron 3, husi na’in 15, na’in 1 mak grave,” Emilia hateten ba jornalista iha Sentru Saúde Comoro, Kinta (05/11/2026).
Nia aumenta katak transferénsia ba HNGV mosu tanba Sentru Saúde Comoro seidauk iha ekipamentu médiku sufisiente atu atende kazu grave.
(dom)
