BAUCAU, STLTIMORLESTE.com – Ministra Edukasaun, Dulce de Jesus Soares, inaugura edifísiu foun EBF Yatua, iha Suku Buibau, Baucau Vila, ne’ebé hetan apoiu finanseiru husi doadór Austrália.
Edifísiu foun ne’e kompostu husi unidade rua ho sala haat, inklui sala aprendizajen tolu ba estudante sira, sala ida ba profesór no dapur ida ba implementasaun programa merenda eskolar.
Konstrusaun infraestrutura ne’e hetan finansiamentu husi komunidade no doadór sira iha Austrália, nu’udar parte husi apoiu ba dezenvolvimentu edukasaun iha Timor-Leste.
Iha intervensaun, Ministra Edukasaun, Dulce de Jesus Soares, hato’o agradese ba doadór sira husi Austrália ne’ebé kontinua fó apoiu ba Ministériu Edukasaun, liuliu iha dezenvolvimentu infraestrutura eskolar iha Munisípiu Baucau.
Nia informa katak, doadór sira ne’e konstrui ona eskola hamutuk neen iha Munisípiu Baucau, inklui iha Suku Macalaco, Ossoluga, Seiçal, Ostico no EBF Yatua, no sei kontinua apoiu konstrusaun eskola sira seluk ne’ebé presiza infraestrutura.
“Eskola maski kapas, maibé depende ba ema ne’ebé uza eskola ne’e. Koordenadór eskola no profesór sira tenke garante atu hetan rezultadu,” Ministra Dulce dehan hafoin serimónia inaugurasaun EBF Yatua, Sábadu (07/11/2026).
Iha fatin hanesan, Embaixadora Boa Vontade ba Edukasaun, Kirsty Sword Gusmão, esplika katak orsamentu konstrusaun edifísiu eskola ne’e mai husi komunidade sira iha Austrália, liuhusi doadór ne’ebé kontribui atu fasilita estudante sira hala’o prosesu aprendizajen iha ambiente ne’ebé diak.
Nia subliña katak, infraestrutura eskolar ne’ebé hetan apoiu husi doadór Austrália sira iha Timor-Leste atinje ona unidade 31, inklui edifísiu foun EBF Yatua.
“Sira ne’e belun boot ho fuan boot ba Timor-Leste. Tinan ba tinan sira kontinua apoiu Ministériu Edukasaun ho infraestrutura eskolar iha Timor-Leste,” Kirsty Sword Gusmão informa.
Nia husu ba Servisu Munisípal Edukasaun Baucau, koordenadór eskola no komunidade atu tau matan ba edifísiu foun ne’e, hodi evita estragus no garante infraestrutura refere bele uza ba tempu naruk.
Kirsty mós dezafia profesór sira atu utiliza edifísiu foun ne’e ho métodu hanorin ne’ebé sentradu ba estudante, hodi garante kualidade ensinu no aprendizajen.
“Ida ne’e signifika katak labarik sira aprende ho ativu, la’ós de’it kopia husi kuadru, maibé sira tenke ativu iha prosesu aprendizajen,” nia afirma.
Enkuantu, Prezidente Autoridade Munisípal Baucau, Veneranda Lemos, hato’o agradese ba apoiu ne’ebé doadór sira fó ba setór edukasaun iha munisípiu ne’e, no promete sei servisu hamutuk ho responsavel eskola atu asegura manutensaun edifísiu foun Yatua.
“Ami husu nafatin atu Ministériu Edukasaun kontinua iha parseria ho maluk doadór sira atu tau matan nafatin ba infraestrutura edukasaun nian,” Veneranda rekomenda.
Nia mós enkoraja estudante sira atu labele uza tizora, esferográfika, lapizeira no ekipamentu seluk atu riska ka hakerek iha parede eskola, maibé presiza kuida ambiente eskolar, kuda ai-funan no mantein areadór eskola nian.
Koordenadór EBF Yatua, António da Costa Ximenes, hato’o agradese ba parseiru dezenvolvimentu sira ne’ebé konstrui edifísiu foun ba estudante sira, sala ida ba profesór no dapur ida ba programa merenda eskolar.
“Edifísiu foun ne’e ami orgullu boot ba sira nia laran luak ne’ebé halo eskola ida ho tipu modernu. Maibé antes ne’e, ami nia eskola tali tahan to’o iha 2009, ami koordena ho inan-aman konstrui rasik ami nia edifísiu. Hafoin pakote referendu tama iha 2011, edifísiu ne’e dodok tiha. Ha’u halai tun-sae husu ajuda, maibé la hetan. Ajuda mai fali husi estudante Austrália sira ne’ebé troka bebak no kalen, no agora hetan tan ajuda husi doadór Austrália,” António konta istória EBF Yatua.
Serimónia inaugurasaun ne’e hetan partisipasaun husi Ministra Edukasaun, Prezidente Autoridade Munisípal Baucau, reprezentante doadór Austrália, Komandante Komandu Polísia Munisípiu Baucau, estrutura Servisu Munisípal Edukasaun Baucau, profesór sira, estudante no inan-aman sira.
(tom)
