FILIPINA, STLTIMORLESTE.com – Governu Filipina loke ofisialmente Sentru Mídia Internasionál, iha World Trade Center Metro Manila, Pasay City, Sesta-feira (13/11/2026), atu apoia jornalista sira kobertura Simiéra ASEAN-49.
Abertura sentru mídia ne’e lidera husi Sekretáriu Interinu Gabinete Komunikasaun Prezidensiál (PCO), Lino Cayetano, hamutuk ho Sekretária Turizmu, Dita Angara-Mathay, no Diretora-Jerál Operasaun Konsellu Nasionál Organizadór ASEAN 2026, Ma. Hellen B. De La Vega.
Iha serimónia abertura, Lino Cayetano afirma katak sentru ne’e prepara atu fasilita jornalista nasionál no internasionál sira-nia servisu kobertura ho profisionalizmu, konfortu no liberdade.
Nia esplika katak, sentru mídia ne’e la’ós de’it fatin servisu ba jornalista sira, maibé mós sai hanesan janela atu aprezenta Filipina nia kultura no riku-soin ba mundu.
“Fatin ida-ne’e harii ba imi atu hala’o knaar ho di’ak, profisionalizmu no liberdade, no mós atu hatudu Filipina nia riku-soin ba mundu,” dehan Lino Cayetano.
Iha okaziaun ne’e, Cayetano konvida jornalista sira atu aproveita tempu livre hodi vizita pavilhaun sira ne’ebé prepara iha sentru mídia.
Pavilhaun hirak-ne’e aprezenta kultura, destinasaun turístika, produtu lokál no setór indústria Filipina nian ba reprezentante mídia sira.
“Ami konvida imi atu vizita fatin furak sira, haree produtu lokál, indústria no riku-soin espesiál ne’ebé povu Filipinu iha,” nia hatutan.
Cayetano mós reafirma, kompromisu PCO no Governu Filipina atu kontinua fó apoiu ba jornalista sira durante kobertura eventu rejionál ne’e.
“Ami iha PCO no Governu prontu atu servisu no fó apoiu ba imi-nia knaar jornalístiku,” nia afirma.
Nia manifesta esperansa katak, enkontru lider ASEAN sei lori solusaun ba dezafiu komún sira no kontribui ba futuru di’ak liu ba povu rejiaun nian.
Abertura Sentru Mídia Internasionál ne’e sai parte husi preparasaun Filipina nu’udar nasaun anfitriaun ba Simiéra ASEAN-49.
Simiéra ASEAN-49 sei hala’o iha Manila, Filipina, husi 15 to’o 17 Novembru 2026, ho partisipasaun lider no reprezentante husi nasaun membru ASEAN.
Liu husi sentru ne’e, jornalista nasionál no internasionál sira bele asesu informasaun no fasilidade atu akompaña no halo kobertura direta ba atividade sira durante enkontru rejionál ne’e.
(jen)
