DILI, STLTIMORLESTE.com – Ekipa basquetebol feto Munisípiu Lautem hetan vitória ho rezultadu 70–31 kontra Munisípiu Baucau, iha kompetisaun Festival Nasionál Desportu (FND) 2026, modalidade basquetebol feto, ne’ebé hala’o iha kampu basquetebol área Ginásiu Desportu Dili, Kinta-feira (19/11/2026).
Iha parte dahuluk, Lautem hahú jogu ho difikuldade bainhira Baucau hetan pontu dahuluk. Maibé, Lautem konsege muda situasaun no remata períodu dahuluk ho vantajen 18–7.
Iha períodu daruak, Lautem kontinua hatudu dominíu iha jogu, aumenta pontu no taka parte dahuluk ho rezultadu 30–16, depois de ekipa rua halo deskansu durante minutu lima.
Depois deskansu, Lautem kontinua aumenta presaun no domina períodu terseiru, ho pontu 53–19. Iha períodu ikus, Lautem aumenta tan pontu no remata kompetisaun ho vitória klaru 70–31.
Durante jogu, apoiantes no simpatizantes husi munisípiu rua kontinua fó motivasaun no animasaun ba sira-nia ekipa, liuhusi aplauzu no apoiu bainhira atleta sira konsege aumenta pontu.
Rezultadu ne’e hatudu dominíu Lautem iha modalidade basquetebol feto, enkuantu Baucau kontinua buka oportunidade atu hasa’e prestasaun iha kompetisaun FND 2026.
(leo)






