DILI, STLTIMORLESTE.com – Primeiru-Ministru (PM), Kay Rala Xanana Gusmão fila hosi Filipina hafoin partisipa iha Simeira ASEAN ba dala 49 no enkontru relasionadu sira, ne’ebé marka partisipasaun Timor-Leste nu’udar membru plenu ba-11 iha organizasaun rejionál ne’e.
Iha Aeroportu Komoro, PM Xanana aprezenta emblema ASEAN ba povu Timor-Leste, nu’udar símbolu identidade, pertense no kompromisu nasaun nian iha komunidade rejionál.
“Uluk símbolu iha emblema ida-ne’e hamutuk 10 de’it, maibé agora ho prezensa Timor-Leste nian aumenta tan sai 11,” hatete Primeiru-Ministru (PM) Timor-Leste, Kay Rala Xanana Gusmão iha Aeroportu Komoro, Kinta (19/11/2026).
Nia esplika, partisipasaun Timor-Leste iha Simeira ASEAN ba dala 49 ne’e reprezenta etapa importante ida iha prosesu integrasaun rejionál, hafoin nasaun ne’e hetan estatutu membru plenu ba-11 ASEAN iha 26 Outubru 2025.
Nia deklara, durante enkontru iha Manila, PM Xanana hamutuk ho líder ASEAN no parseiru estratéjiku sira, partisipa iha diskusaun kona-ba prioridade rejionál, kooperasaun ekonómika, seguransa, estabilidade no dezenvolvimentu sustentável.
Nu’udar membru plenu, Timor-Leste agora iha oportunidade atu kontribui diretamente ba prosesu foti desizaun, dezenvolvimentu polítika komún no kooperasaun iha pilar tolu ASEAN: Komunidade Polítika-Seguransa, Komunidade Ekonómika no Komunidade Sosio-Kulturál.
Entretantu aprezentasaun emblema ASEAN ba povu Timor-Leste ne’e simboliza identidade nasionál nu’udar parte integrante hosi komunidade ASEAN, no responsabilidade nasionál atu kontribui ba pás, estabilidade no prosperidade rejionál.
(jen)






