PNTL Reforsa Seguransa Atu Garante Estabilidade iha RAEOA

Foto: STL/Joseph Koa

AMBENO, STLTIMORLESTE.com – Komandante Polísia Nasionál Timor-Leste (PNTL), Superintendente-Xefe Polísia Nicolau Francelino da Costa, afirma katak PNTL kontinua fó atensaun ba situasaun seguransa iha Rejiaun Administrativa Espesiál Oecusse-Ambeno (RAEOA), liuliu iha zona fronteira ho Indonézia, atu garante estabilidade no seguransa ba komunidade.

Komandante PNTL RAEOA, hatoo informasaun nee ba STL hafoin partisipa iha sosializasaun Lei Abitasaun neebe organiza husi Ministériu Obras Públikas iha Salaun Alfândega 1 de Maiu, Palaban, Suku Costa, Postu Administrativu Pante Macassar, RAEOA, Kinta (19/11/2026).

Nicolau Francelino da Costa hateten katak, seguransa iha zona espesiál presiza hetan atensaun permanente, inklui kontrolu ba atividade ilegál sira, hanesan kontrabandu iha área fronteira entre Timor-Leste no Indonézia.

Nia esplika katak, PNTL kontinua halo identifikasaun no investigasaun ba kazu no insidente sira ne’ebé akontese, atu asegura katak prosesu investigasaun hala’o tuir prosedimentu legál no informasaun relevante bele aprezenta ba públiku.

Iha fulan Novembru, autoridade seguransa rejista mós insidente balu, inklui kazu ne’ebé envolve membru PNTL no unidade Tránzitu. Kazu sira ne’e presiza hetan investigasaun no klarifikasaun husi entidade kompetente.

Komandante PNTL enfatiza katak manutensaun seguransa no estabilidade importante tebes, liuliu iha períodu preparasaun no realizasaun eventu komemorativu Independénsia, atu komunidade bele partisipa iha atividade sira ho hakmatek no seguru.

“Hau husu ba Komunidade hotu iha Oecusse atu kontinua mantein estabilidade hodi komemora loron Proklamasaun Independénsia Timor-Leste ba dala 51 neebe tinan nee sei halao iha Postu Administrativu Pasabe.

Iha fatin ketak, Prezidente Autoridade Rejiaun Espesiál Oecusse-Ambeno (PA-RAEOA), Regio da Cruz Salu dehan, dadaun nee halo ona preparasaun no sei abertura komemorasaun loron Proklamasaun Independénsia instituisaun ba dala 51 iha Oecusse ho eventu Boxing iha kampu Futebol Oebau Oecusse.

“Hau husu ba Povu Oecusse atu partisipa iha serimónia abertura komemorasaun loron Proklamasaun Independénsia Timor-Leste Leste ba dala 51 ho eventu Boxing iha Kampu Futebol Oebau iha loron Sesta lokraik,” dehan nia.

Iha biban nee, Abilio Colo nuudar povu Oecusse, apresia ho autoridade RAEOA ho estrutura deside komemorasaun Loron Proklamasaun Independénsia ba dala 51 ba area rurais iha Pasabe hodi anima povu.

(jos)

Share it :

Leave a Reply

Your email address will not be published. Required fields are marked *