DILI, STLTIMORLESTE.com – Adidu Polisia Republik Indonesia (POLRI) iha Embaixada Republika Indonezia (KBRI) Dili, Timor Leste, Komisariu Xefe Polisia, Don Gaspar da Costa halao despedida ho Primeiru Ministru (PM), Kay Rala Xanana Gusmão, tanba misaun remata ona.
“Hau mai iha Palasiu Governu hasoru malu ho Primeiru Ministru, Kay Rala Xanana Gusmão, hodi halao despedida tanba durante nee Xanana Gusmão sai hanesan inspiradór, motivadór neebe sempre tau matan, sempre fo oportunidade atu ami bele halao knaar no bele hakat ba oin iha misaun durante iha Timor Leste, liu-liu iha knaar sira hanesan adidu POLRI,” dehan Don Gaspar da Costa ba jornalista sira iha Palasiu Governu, Sesta (28/02/2025).
Iha oportunidade nee Don Gaspar da Costa husu nafatin apoiu moral husi Xefe Governu, nunee nia bele fila fali ba halao knaar ho diak iha Kuartel Jeneral Polisia iha Indonezia.
Nia mos agaradese no dezeja susesu nafatin iha relasaun amizade entre Timor Leste ho Indonezia espesialmente POLRI, PNTL, PCIC ho SNI.
Komissariu Xefe Polísia, Gaspar Mikel da Costa simu kondekorasaun ho Medalha Ordem Timor Leste nian husi Prezidente Republika Demokratika Timor Leste, José Ramos Horta, iha loron 26 Novembru 2024.
Medalha Ordem Timor Leste nuudar premiu aas liu neebe oferese husi Estadu Timor Leste ba indivídu, organizasaun ka instituisaun neebe fo kontribuisaun estraordinaria ba povu no nasaun Timor Leste.
Premiu nee hanesan simbolu rekonesimentu ba servisu signifikativu sira iha area umanitaria, polítika, sosial, ekonomia, kultura, diplomasia, dezenvolvimentu no mos relasaun internasional, neebe ajuda dezenvolve nasaun Timor Leste.
Tanba nee, premiu nee oferese ba Don da Costa ba dedikasaun neebe nia halo ona hanesan mós alumni Victoria University Melbourne 2006, liu husi ninia atividade oin-oin neebe iha impaktu pozitivu ba Timor Leste dezde hahú servi hanesan Adidu Polísia iha Díli, 08 Marsu 2022.
Don da Costa hanesan mos eis xefe Relasaun Públika Polisia Nasaun Unidas (ONU) nian iha Afrika, espesifikamente iha Sudaun no mós Sudaun Sul.
(alb)
