DÍLI, STLTIMORLESTE.com – Ekipa voleibol feto ADR União derrota Cablaci ho rezultadu 3–1 iha Liga Nasionál Voleibol Timor-Leste Primeira Divizaun.
Enkontru ne’e hala’o iha Ginásio Desportu Díli, kuarta-feira (28/10/2026), nu’udar parte husi kontinuidade kompetisaun Liga Nasionál Voleibol Timor-Leste, époka dahituk 2026.
Iha set dahuluk, ADR União hatudu dominasaun liuhusi atake no defeza ne’ebé forte, hodi manán Cablaci ho pontu 25–17.
ADR União kontinua hatudu konsisténsia iha set daruak, maski Cablaci fó rezisténsia maka’as. ADR União konsege manán ho pontu 25–22, hodi aumenta vantagem ba 2–0.
Iha set datoluk, Cablaci muda estratéjia no hadi’a sistema atake no defeza, hodi manán ADR União ho pontu 25–16, no reduz diferensa ba 2–1.
Maibé, iha set dahat, ADR União fila fali domina jogu ho atake no bloku ne’ebé efetivu, hodi manán 25–18 no taka enkontru ho rezultadu 3–1.
Durante enkontru, ekipa rua hatudu kapasidade téknika liuhusi smes, passing, servisu no bloku, ne’ebé halo kompetisaun sai maka’as no atrativu.
Apoiantes husi ekipa rua mós fó animasaun ba atleta sira durante enkontru, hodi aumenta espíritu kompetitivu no desportivu iha kampu.
Vitória ne’e sai rezultadu pozitivu ba ADR União iha kompetisaun Primeira Divizaun, enkuantu Cablaci presiza hadi’a preparasaun no estratéjia atu enfrenta jogu sira tuirmai.
(leo)
