DILI, STLTIMORLESTE.com – Sekretáriu Jerál Partidu FRETILIN, Mari Alkatiri husu Primeiru-Ministru (PM) Kay Rala Xanana Gusmão atu identifika lalais jestór ka autor prinsipál sira neebé suspeita fasilita atividade Scam Call Center iha Timor-Leste.
Alkatiri hatoo deklarasaun nee ba jornalista sira iha edifísiu rezidénsia eis titulár, iha Farol, Díli, Sesta nee (11/09/2026).
Alkatiri konsidera katak durante nee autoridade sira liuliu kaer no detein traballadór sira neebé suspeita envolve iha atividade ilegal nee, maibé seidauk iha informasaun públika kona-ba ema sira neebé nia konsidera hanesan jestór ka autor prinsipál.
Nia hatete, nia preokupa ho atividade scam call center neebé, tuir nia, autoridade seguransa sira identifika iha fatin oin-oin iha Díli no munisípiu sira seluk.
Tuir Alkatiri, durante investigasaun sira neebé halao ona, autoridade sira identifika liuliu traballadór husi nasaun oin-oin neebé suspeita envolve iha atividade nee.
Tanba nee, nia husu PM Xanana atu asegura investigasaun lao too ba nível jestór ka autor prinsipál sira neebé suspeita organiza no fasilita atividade scam call center iha Timor-Leste.
“Sira sai no tama avontade. As vezes aviaun mak mai foti tan. Nee nain iha ita nia leet. Nee mak hau husu ba Primeiru-Ministru atu identifika se mak nain. Laós kontente deit ho kaer ema nain 20 iha hotel, nia naran mós la fó sai”, dehan Alkatiri.
Alkatiri afirma katak kazu droga bele fasil liután ba autoridade sira atu kontrola kompara ho atividade scam call center online, tanba atividade nee uza teknolojia neebé avansadu no bele opera ho maneira neebé difísil atu deteta.
Nia mós sublinha katak, traballadór sira neebé autoridade kaer ka detein laós necessariamente sira mak responsável prinsipál, tanba balun bele deit buka servisu no lori mai Timor-Leste hodi servisu.
“Wainhira halo investigasaun, autoridade sira husu ba sira, sira sei la hatene nain mak se, nain loloos se. Odamatan tama no sai nakloke hotu. Entaun, nain iha ita nia leet. Se lae, nunka bele akontese”, dehan Alkatiri.
Nia husu autoridade kompetente sira atu kontinua investigasaun ho klean hodi identifika ema ka grupu sira neebé iha responsabilidade prinsipál ba atividade scam call center no asegura katak prosesu legal aplika ba parte hotu neebé prova envolve.
(alb)
