DILI, STLTIMORLESTE.com – Hahu husi loron 19 Maiu too 5 Junhu, dadus provizoriu aplikantes neebe la pasa iha teste bolsa kandidatu profesores ba nivel sekundariu no tekvo hamutuk 6.544, no 353 mak pasa ona iha teste refere.
Kestaun nee hatoo husi Diretor Nasional Rekursu Umanu iha Ministeriu Edukasaun, João Amaral ba jornalista STL iha nia knaar fatin Vila Verde, Tersa nee (10/06/2025).
“Hahu husi loron primeiru teste iha dia 19 fulan Maiu too mai iha dia 5 fulan nee, aplikantes neebe mak la pasa iha teste nee hamutuk 6.544, no aplikantes neebe mak pasa ona iha teste nee hamutuk 353, nee kada grupu, tanba valor mak la too,” hatete João.
João hatutan, eis profesores kontratu hamutuk 725 sei halao teste iha loron 16 fulan ida nee, teste nee halao ba sira mesak deit, la hamutuk ho aplikantes sira seluk.
“Dia 17 Junhu nee ita halo teste ba sira neebe momentu ita renunsia, selesaun dokumentus sira neebe mak ita fo 10 dias mai reklama nee mak ita fo teste ba sira iha loron 17 Junhu, no dia 16 Junhu nee ba ita nian eis profesores kontratu 2023 ninia,” katak nia.
Nunee mos Paulo de Jesus Magno hanesan aplikantes, eis manorin kontratu 2023 dehan, aat liu teste ida nee vaga ba bolsu kandidatu, kuandu liu sai fali kandidatu profesor, afinal tinan barak ona sai ona profesor.
“Ami bele tuir teste, bele mos la tuir teste, tanba foin hatama deit dokumentu balu esklui no balu kategoria la liu, teste ida nee laos valoriza ami ou solusaun ba ami nia problema, teste ida nee Ministeriu Edukasaun nia planu, ami labele halo tan protestu ou asaun. Pesoal Hau bele tuir teste, maibe ami presiza tur hamutuk,” dehan nia.
(jac)
