DILI, STLTIMORLESTE.com – Reprezentante Organizasaun Mundial Saude (OMS) iha Timor Leste, Arvindo Mathur hatete, variante foun Covid-19 neebe konhesidu ho naran NB:1.8.1 afeta daudaun nasaun sira hanesan Índia, Bangladesh no Tailándia, ladun iha impaktu hanesan ho surtu Covid-19.
“Variante foun husi Covid-19 ho naran 1.8.1 neebe akontese iha Bangladesh, Índia ho Tailándia, laiha transmisaun makaas hanesan uluk ho Covid-19 no sei la hamosu gravidade,” reprezentante Organizasaun Mundiál Saúde (OMS) iha Timor Leste, Arvindo Mathur ba jornalista sira iha Hotel Novu Turizmu, Kinta (04/06/2025).
Nia tenik, variante foun bele kontrola no prevene liu husi uza maskara no fase liman, ijiene no halo sensibilizasaun informasaun ba komunidade sira.
Nia esplika, tuir OMS Timor Leste, iha posibilidade menus ba variante foun neebe tama iha Timor Leste, maibe kontinua iha alerta ba kazu foun sira Covid-19 nian;“ ita iha kapasidade laboratoriu nasional ida atu halo teste karik variante foun nee mosu,” nia deklara.
Iha fatin hanesan, Vise Ministru ba Fortalesimentu Institusional Saude (VMFIS), José dos Reis Magno informa, Governu bele kontrola entrada ba area fronteira sira hanesan rai maran, aeroportu no tasi.
“Ita iha fronteira husi Singapura, hanesan Aero Dili no Citilink, no fronteira terrestre no movimentu populasaun husi kapitál ba foho, ita mos iha orientasaun husi Ministra Saude atu reativa fali intervensaun sira neebe ita halao antes Covid-19,” nia afirma.
(jen)
