AINARO, STLTIMORLESTE.com — Komunidade Postu Administrativu Hato-Builico, Munisípiu Ainaro, lamenta tebes ho asaun husi pesoal ka grupu deskonhesidu neebe sunu dut iha area protejida Santuariu Foho Ramelau, tanba hahalok nee ameasa direta ba ekosistema no turizmu iha fatin sagradu nee.
Asaun sunu dut nee kauza estragu ba ambiente no biodiversidade, nunee hamosu preokupasaun boot husi populasaun lokal sira neebe hela iha area besik.
Ramelau nuudar fatin neebe hetan protesaun husi lei tanba reprezenta area neebe riku ho flora no fauna, tan nee hahalok sunu dut ho intensionál nee konsidera hanesan krime neebe husik ameasa boot ba ekosistema no turizmu iha Timor Leste.
Hafoin akontesimentu nee, komunidade Hato-Builico, José da Araújo husu ba autoridade lokal, liu-liu Polísia Nasional Timor Leste (PNTL) no ekipa Guarda Florest sira atu foti asaun seriu no halo investigasaun hodi buka tuir autor sira neebe komete hahalok la ho responsabilidade nee.
“Ita husu ba parte kompetente atu reforsa vigilansia, atu ema seluk nafatin labele estraga fali area sagrada ne’e,” dehan José da Araújo ba STL liu husi telefone, Sesta nee (21/08/2026).
Nia dehan, area protejida Ramelau nee nuudar patrimoniu boot no rikusoin nasaun nian neebe preciza kuidadu husi parte hotu-hotu, laos husi komunidade deit maibe mos husi autoridade sira atu labele mosu fali insidente hanesan iha tempu oin.
Iha fatin ketak, Observador Meiu-Ambiente, Marcelino Soares, hatete katak aksaun sunu duut maran ka du meami iha area protejida nee fo impaktu aat tebes ba ai-horis sira no estraga mos helik-fatin ba animal sira iha Foho Ramelau, nunee husu ba Governu atu foti medida legal tuir lei neebe vigora.
“Hau husu mos ba autoridade kompetente sira atu foti prosesu legal no lalais kontra autor sira, nunee bele sai lian hanorin ba ema hotu atu labele brani estraga fali ambiente iha area protejida sira,” dehan Marcelino.
Nia dehan, presiza mos sosializasaun no sensibilizasaun kontinua ba komunidade sira iha fatin nee no publiku em jeral, hodi nunee bele hamutuk proteje rikusoin natural no foti kampanha prevensaun iha tempu bai-loron neebe risku boot ba ahi han-du’ut ka ahi han-ai.
Entretantu notísia nee sai, parte autoridade sira sei iha hela prosesu foti dadus no buka atu hatene loloos motivu husi kazu sunu dut iha area protejida nee.
(car)
