AMBENO, STLTIMORLESTE.com — Ministério Ensino Superior, Siénsia no Kultura (MESSK) hala’o sosializasaun kona-ba asesu ingresu UNTL no IPTL tinan akademiku 2027, ho PA-RAEOA husu prosesu transparente no bazeia ba méritu.
Sosializasaun ne’e hala’o iha Salaun Alfândega 1 de Maiu, Palaban, Suku Costa, Postu Administrativu Pante Macassar, RAEOA, terça-feira (15/09/2026), hahu ho kanta Hino Nasional “Pátria Pátria”, tuir kedas ho minutu ida silénsio atu onra mártir sira ne’ebé sakrifika sira-nia moris ba libertasaun Timor-Leste.
Hafoin serimónia abertura, Prezidente Autoridade RAEOA, Regio da Cruz Salu, iha enkontru ho jornalista sira, husu ba ekipa inskrisaun estudante foun UNTL-IPTL atu garante transparénsia iha prosesu tomak no evita familiarizmu ka favoritismu.
“Hau nu’udar Prezidente Autoridade RAEOA, husu atu hotu-hotu garante transparénsia. Nune’e, Autoridade apela atu prosesu ne’e tenke bazeia ba méritu no notas estudante nian, hodi evita familiarizmu ka favoritismu,” dehan Regio da Cruz Salu.
Regio mós husu ba autoridade lokal no dirijente eskola sira iha Oecusse atu kontinua fahe informasaun kona-ba prosesu asesu ingresu ba públiku no estudante sira, hodi sira bele prepara an diak atu asesu ba ensinu superior públiku iha UNTL no IPTL.
Iha oportunidade ne’ebá, Diretór Nasionál Ensinu Superior, Higino Alves, hatete katak desiminasaun ne’e bazeia ba Dekretu-Lei Nú. 24/2025, loron 30 Jullu.
Programa ne’e, tuir Higino, atu fasilita estudante husi munisípiu 13, inklui RAEOA no Ataúro, atu asesu ba ensinu superior iha UNTL no IPTL liuhusi rejime espesial no rejime jerál.
“Kada tinan, bainhira tama ona iha tinan akademiku foun, sempre halo sosializasaun kona-ba prosesu asesu ingresu iha UNTL-IPTL. Tanba ne’e, husu ba autoridade lokal no dirijente eskola sira atu kontinua desimina informasaun ba Oecusse oan sira atu partisipa,” dehan Higino.
Sosializasaun ne’e hetan partisipasaun husi xefe suku 20, dirijente eskola, jestor postu administrativu haat no estrutura Autoridade RAEOA.
Bazeia ba Memorandu Entendimentu (MoU) entre MESSK, Ministério Administrasaun Estatal (MAE) no Ministério Solidariedade Sosial no Inkluzaun (MSSI), xefe suku sira iha papel importante atu fornese deklarasaun ba estudante sira ne’ebé kumpre kritériu atu asesu liuhusi rejime espesial.
(jos)
