DILI, STLTIMORLESTE.com – Relasiona ho estrada kotu ligasaun husi kruzamentu Laclubar ba iha Suku Manelima, Postu Administrativu Laklubar, Munisipiu Manatuto, tanba nee Autoridade Lokal Manelima husu Ministeriu Obras Publika (MOP) urjenti normaliza estrada, nunee komunidade bele asesu.
Autoridade Lokal Manelima, Antonio Pereira informa, problema kona-ba estrada nee seriu, tanba komunidade asesu ba estrada nee 3 mil ital, dalan kotu iha loron 24 Fevereiru 2026, maibe ema ho motor bele asesu nunee iha fulan Abril 2026 estrada kotu total ema liu la diak no transporte labele halo movimentu, tanba udan boot durante semana ida nia laran.
Estrada kotu iha kruzamentu laos mai Suku Manelima deit, maibe dalan nee mos liga ba Postu Soibada no Natarbora.
“Hau nuudar autoridade rekomenda ba MOP atu foti desizaun mediata atu nunee bele aselera normaliza dalan nee atu komunidade bele asesu,” hatete Xefe Suku Manelima, Antonio Pereira liu husi telefone Sabadu (30/05/2026).
Nia dehan, estrada kotu nee afeita makaas ba ekonomia, komunidade labele asesu merkadu, saude inan isin rua atu partus difisil tebes, tanba husi suku ba postu dalan kotu total liu la diak.
Relasiona akontesimentu nee, nuudar Autoridade hatoo karta ba Prezidente Munisipiu Manatuto, Nasionál inklui Parlamentu Nasional, hau rasik ba dala rua ou tolu nunee deputadu sira hatoo iha neeba, maibe too agora seidauk iha solusaun.
Nia dehan, husi kruzamentu Laklubar mai iha Suku Kilo sanulu.
“Hau sente triste, tanba parte relevante la tau perioridade ,” dehan nia.
Tanba Xefe Suku enkontru ona ho Xefe Aldeia sira buka solusaun sei halo ponte provizioriu ai ho au atu motor bele liu atu nunee ema moras urjenti asesu dalan nee, baibain halo ponte ba iha mota maibe ida rai maran halo ponte, oinsa para komunidade bele asesu iha situasaun emerjensia.
Nia dehan, produtu lokal neebe komunidade produs susar atu asesu ba iha merkadu.
(joa)
