DILI, STLTIMORLESTE.com – Prezidente Republika (PR), Jose Ramos Horta hatete, bainhira nia simu konvite husi Prezidente Partidu FRETILIN nomos Sekretariu Jeral Partidu, nia respeita no sei ba partisipa, tanba nia mos hanesan fundador ba ASDT nomos FRETILIN.
Lia hirak nee Prezidente Republika hatoo hodi responde ba deklarasaun Sekretariu Jeral Partidu FRETILIN, Mari Alkatiri neebe hatete, Comite Central FRETILIN (CCF) sei atribui sertifikadu rekonhesimentu ba Prezidente Republika (PR), Jose Ramos Horta ba ninia kontribuisaun luta ba ukun rasik aan liu-husi envolve aan iha CCF.
“Iha 27 hau sai ba liur, hau fila dia 31 lokraik, se hau simu konvite hau sempre ba, klaru hau laiha problema, hau sempre la haluha hau fundador, hau bele fundador fraku ida, hau nia kontribuisaun bele fraku maibe hau fundador duni, maizumenus ASDT nee hau fundador duni, nee hau ho Avo Xave, agora FRETILIN hau nia fundador bele fraku oituan karik maibe fundador duni,” katak PR, Horta.
Prezidente Republika hatete, nuudar fundador ASDTL nomos FRETILIN mos nafatin hatudu respeita no hakruuk ba memoria hotu iha FRETILIN no eroi sira neebe mak fo aan mate ba luta libertasaun nasional ikus Timor Leste hetan ukun rasik aan.
“Sempre respeita memoria hotu-hotu iha FRETILIN neebe mate iha tempu luta neeba,” katak PR, Ramos.
Sekretariu Jeral FRETILIN, Mari Bim Amude Alkatiri hatete, CCF sei atribui sertifikadu rekonhesimentu ba Prezidente Republika (PR) Jose Manuel Ramos Horta ba ninia kontribuisaun luta ba ukun-rasik aan liu-husi envolve aan iha CCF.
Sekretariu Jeral FRETILIN, Mari Bim Amude Alkatiri hatoo lia hirak nee iha ambitu reflesaun memoria Invazaun Militar Indonezia invade iha Timor-Leste iha loron 07 Dezembru 1975 no ezistensia tinan 50 FRETILIN.
Iha ambitu reflesaun memoria 07 Dezembru, CCF mos atribui sertifikadu rekonhesimentu ba eis FALINTIL, Veteranu, FALINTIL ativu nomos saudozu sira, neebe kontribui ba independensia TL nian. Ho nunee, Sekretariu Jeral FRETILIN deklara katak, iha tempu badak CCF sei atribui sertifikadu rekonhesimentu ba Prezidente Republika Jose Ramos Horta.
“Ramos Horta iha 31 Dezembru sei simu sertifikadu, hau nia liafuan ikus mak ida nee, Ramos Horta sei simu sertifikadu, nia la mai la buat ida, maibe nia sei simu sertifikadu iha 31 Dezembru”, deklara nia.
Nunee mos Koordenador Komisaun Organizadora, Jose Manuel Fernandes “Nakfilak” esplika, tuir rezolusaun numeru-4 CCF nian iha 5 Agostu hodi harii komisaun-lima, ida mak nee atu komemora 50-anos ezistensia FRETILIN ninian, hahu husi 20 Maiu hahu halo atribuisaun ba maluk sira lubuk ida too ohin 7 Dezembru.
Nia dehan, loron espesial neebe hili nuudar loron memoria nian atu fo ba ema idak-idak ho atribuisaun sertifikadu nee atu hanoin hikas tinan 49-anos.
(eme)
