DÍLI, STLTIMORLESTE.com — Confederação do Desporto de Timor-Leste (CDTL) realiza Semináriu Nasionál kona-ba dezenvolvimentu kapasidade treinador desportivu, hodi hasa’e prestasaun atleta nasionál iha Timor-Leste.
Semináriu ne’e hala’o iha salaun ETDA, Dili, iha loron Terça feira, 27 Outubru 2026, ho partisipasaun pesoál sira ne’ebé iha responsabilidade iha dezenvolvimentu desportu nasionál.
Prezidente CDTL, Afrânio Xavier Amaral, hatete katak semináriu ne’e importante tebes tanba Timor-Leste sei enfrenta limitasaun iha númeru no kapasidade treinador sira kompara ho nesesidade desportu iha nivel ASEAN.
Nia esplika katak, federasaun desportiva ida-idak iha treinador na’in ida, rua ka tolu de’it, ne’ebé sei sai dezafiu ba dezenvolvimentu atleta no preparasaun ekipa nasionál.
Tuir Afrânio, relatóriu kona-ba kondisaun desportu iha nivel rejionál hatudu katak Timor-Leste presiza hametin rekursu umanu, liuliu treinador no árbitru sira.
Tanba ne’e, CDTL konvida peritu husi nasaun viziñu Indonézia atu fahe koñesimentu no esperiénsia, hodi ajuda federasaun desportiva sira dezenvolve formadór no hasa’e kualidade formasaun treinador.
Nia hatutan, CDTL kontinua fó prioridade ba kapasitasaun, ho esperansa katak iha tinan sira oin mai Timor-Leste bele iha treinador ho kapasidade no prestasaun ne’ebé di’ak liu.
Iha fatin hanesan, Diretora Nasionál Desportu Federadu, Josefina Zeca Pinto, hato’o apresiasaun ba inisiativa CDTL no konvite peritu husi Indonézia atu fahe sira-nia matenek no esperiénsia ho treinador Timor-Leste nian.
Josefina subliña katak, atleta ne’ebé reprezenta Timor-Leste iha kompetisaun nasionál no internasionál presiza hetan orientasaun husi treinador ne’ebé iha kualifikasaun no sertifikadu.
Nia afirma katak, formasaun treinador la’ós atu aprende de’it liuhusi esperiénsia, maibé presiza mos koñesimentu tékniku no akompañamentu profisionál, atu bele dezenvolve kapasidade atleta iha modalidade desportiva ida-idak.
Josefina mós esplika katak, Governu liuhusi Ministériu Juventude, Desportu, Arte no Kultura (MJDAC) no Direksaun Nasionál Desportu Federadu, apoia fundu ba CDTL atu realiza formasaun no atividade seluk ne’ebé kontribui ba dezenvolvimentu desportu.
Governu reafirma kompromisu atu kontinua servisu hamutuk ho parseiru no federasaun desportiva sira, liuliu CDTL, hodi hametin sistema desportu no hasa’e kapasidade atleta Timor-Leste nian.
Semináriu ne’e mós hetan kontribuisaun husi oradór Indonézia, Johansyah Lubis, ne’ebé okupa pozisaun Xefe BP3 UNJ ba períodu 2025–2029 no Kepala Bidang Kesejahteraan Pelaku Olahraga KONI Pusat ba períodu 2026–2027.
Partisipasaun peritu ne’e espera bele ajuda treinador Timor-Leste nian atu hetan koñesimentu foun, hadi’a métodu treinu no prepara atleta sira atu kompeti ho di’ak liu iha nivel nasionál no internasionál.
(leo)
