DILI, STLTIMORLESTE.com — Prezidente Movimentu Reafirmasaun Reformasaun Nasional (MORRENA), Cesar Valente fo resposta forte kontra hahalok oportunizmu iha mundu polítika, liu husi rejesaun ba hanoin neebe so buka deit benefísiu no projetu ba aan rasik.
Nia haktuir katak, foin lalais nee eis deputadu ida husu pergunta provokativu, konaba nusa mak nia la aproveita nia pozisaun ba buka projetu husi governu hodi hasae moris.
“Kolega eis deputadu ida dehan ba hau, o nee beik liu, nusa la buka projetu ba kaer,” Cesar Valente deklara ba STL iha Dili, Segunda nee (24/08/2026).
Hodi responde ba hanoin oportunista nee, Valente afirma ninia prinsipiu no etika politika neebe firme, hodi hatudu diferensa boot entre buka benefísiu pessoal no kompromisu ba povu.
“Hau hatan simples deit, sim, hau beik atu buka diak ba hau nia aan, maibe hau la beik atu luta nafatin ba ema barak nia mehi no interese,” nia deklara.
Deklarasaun nee Cesar Valente hatoo sai nuudar kritika ba pratika politika neebe so foku deit ba rikusoin no kbiit uma laran, neebe foku liu ba benefísiu an rasik duke foti no luta ba nesessidade no futuru populasaun kbiit laek sira nian.
Iha parte ketak, Observador Polítika, Manuel Soares, konsidera katak atitude no deklarasaun neebe hatoo husi Cesar Valente hatudu kompreensaun no valor etika iha kultura politika no sai nuudar ezemplu diak ba lideransa foun sira. Sira neebe kaer metin prinsípiu no etika moral mak bele sai nuudar pilar ba transformasaun sosio-polítika neebe loos, laos fali sira neebe uza kbiit no posisaun hodi hakruuk ba benefísiu finanseiru no oportunizmu pesoal.
“Ita haree katak fenomenun nee sai matadalan uniku ida mai ita hodi hanoin fali katak futuru nasaun nian presiza lider neebe prioritiza interese kumpreksu sosial, duke uza opurtunidade hodi goza deit benifísiu ba an rasik,” dehan Manuel.
Manuel hatutan, mudansa fundamental iha kultura politika sei la akontese se kuadru no militante sira kontinua simu deit no husik mentalidade oportunista nee domina fali foti desizaun iha nivel hotu-hotu.
Nia sublina katak, sosiedade sivil no povu rasik tenke sai matan moos hodi hili no apoia lideransa sira neebe hatudu duni kompromisu real ba servisu publiku, laos sira neebe haree kargu politika nuudar dalan fasil ida hodi hetan deit rikusoin privadu.
Iha fatin hanesan, Akademista husi Universidade da Paz (UNPAZ), Carlito Soares, salienta katak fenomenu pratika oportunizmu nee hatudu degradasaun moral neebe klean iha sistema demokrasia Timor-Leste nian.
Nia reafirma katak tempu too ona ba akademiku sira no estudante sira hodi halo edukasaun polítika ba komunidade, atu nunee populasaun labele monu ba lasu politika pragmatika neebe faan promesa no projetu ba tempu badak, maibe tenke haree ba vizaun ekonomika no sosial neebe sustentavel ba nasaun nia futuru.
(car)
