DILI, STLTIMORLESTE.com — Prezidente CM-CLN RAEOA, António da Conceição husu Autoridade RAEOA atu harii Jardín dos Eróis ba mártires iha Oecusse.
António da Conceição hato’o pedidu ne’e ba jornalista sira iha Makelab, Suku Taiboko, Postu Administrativu Pante Makassar.
Nia dehan, CM-CLN planeia halo audiénsia ho Prezidente Autoridade RAEOA, Regio da Cruz Salu, kona-ba konstrusaun jardín ne’e.
Jardín ne’e konsidera importante atu fó dignidade ba veteranu no mártires sira ne’ebé mate durante luta libertasaun nasional.
António hateten, mártires sira-nia restu mortal mós presiza hetan oportunidade atu translada ba fatin hakoi ne’ebé dignu.
CM-CLN mós planeia hakerek mártires hotu-hotu nia naran iha jardín, inklui sira ne’ebé hakoi ona iha uma família.
Nia dehan, medida ne’e importante atu jerasaun foun no públiku bele hatene númeru no naran mártires sira ne’ebé mate iha Oecusse.
Dadus CM-CLN hatudu, Passabe rejista mártires nain 9, Pante Makassar nain 49, Oesilo nain 87 no Nitibe nain 17.
Iha parte seluk, Prezidente Autoridade RAEOA, Regio da Cruz Salu dehan, nia planeia halo lutu haleu Jardín Makelab no kuda aifunan.
Regio dehan, medida ne’e atu hadia ambiente monumentu masakre Makelab no transforma fatin ne’e sai fatin onradu ba públiku.
“Ita sei kuda aifunan haleu monumentu masakre Makelab no halo lutu atu sai fatin onradu ba ema hotu.”
Nia hateten, monumentu ne’e sei sai fatin ba públiku atu presta omenajen ba mártires sira ne’ebé oferese aan ba luta libertasaun nasional.
Xefe Aldeia Makelab, Tarcizu Sole hato’o apresiasaun ba Autoridade RAEOA, tanba konsidera nesesidade povu no komemora Konsulta Popular iha Makelab.
Nia mós agradese ba estrutura RAEOA, Ministériu Solidariedade Sosial no Inkluzaun no ekipa nasional ne’ebé partisipa iha komemorasaun.
Tarcizu dehan, komemorasaun Konsulta Popular iha monumentu masakre Makelab fó oportunidade atu fó omenajen ba mártires sira.
Nia mós hato’o apoiu ba planu Autoridade RAEOA atu hadia no dezenvolve monumentu masakre Makelab.
(jos)
