DILI, STLTIMORLESTE.com – Maior Jenerál FALINTIL Forsa Defeza Timor Leste (F-FDTL), Major Jenerál Calisto dos Santos “Coliati” husu Governu atu halakon pensaun veteranu hodi konsentra ba hadia saude no edukasaun, tanba povu terus malnutrisaun no aimoruk laiha iha Hospital Nasional Guido Valadares (HNGV) nomos sentru saude sira iha munisipiu.
Hatete Maior Jenerál F-FDTL, Major Jenerál Calisto dos Santos “Coliati ” hafoin halo reklamasaun iha Ministeriu Asuntu Kombatente Libertasaun Nasionál (MACLN) Komoro, Dili, Kinta (27/02/2025).
Nia dehan, dalan diak neebe atu labele hamosu injustisa iha publikasaun veteranu, mak polítika sira tenke halakon Lei Pensaun veteranu ho osan US$ 30 neebe governu koak kada fulan husi veteranu 2009 nian diak liu haruka fila ba kofre estadu hodi haree ba problema nasaun nian.
Nia tenik, setor edukasaun no saude iha Timor Leste daudaun nee grave, persiza atensaun husi governu.
“Dari pada ita udan bain loron haklalak malu mak veteranu, nee tanba osan, neebe diak liu hakotu ida problema veteranu nee, atu ita labele hafoer beibeik ita nian naran iha mundu nee, diak liu osan ida nee ba kofre estadu, atu ita nia governu tau matan ba nia oan sira nia futuru, liu-liu ba malutrisaun, nomos ba hospital neebe persiza aimoruk atu kura ema moras neebe mate loron-loron, haree mos edukasaun neebe labarik sira barak sei tur iha hadak, balu sei tur iha rai,” hatete Major Jenerál Calisto dos Santos “Coliati ” .
Iha fatin hanesan, Ministru Asuntu Kombatente Libertasaun Nasionál (MACLN), Gil da Costa Monteiro “Oan Soru” deklara, wainhira atu halo mudansa tenke halakon tiha artigu 11 Konstituisaun, Kombatente Libertasaun Nasionál nian.
“Ita tenke halakon tiha artigu artigu 11 Konstituisaun Kombatente Libertasaun Nasional, maibé la signifika lamentasaun ida Major Jenerál Coliati ninia nee mak sai ona fator determinante ita halakon kedas, tanba lei iha dekretu lei no iha mos konstituisaun,” nia afirma.
Entretantu Maior Jenerál F-FDTL, Major Jenerál Calisto dos Santos “Coliati ” sei kontinua hatoo karta konhesimentu ba Prezidente Republika no Tribunal Rekursu nomos Komisaun Anti Korupsaun hodi akompanha problema veteranu iha Timor Leste.
(jen)
