DILI, STLTIMORLESTE.com – Tinan nee Eskola Sekundariu Nobel da Paz fo eskola gratuita ba defisiensia fiziku hamutuk 14 inklui husi uma mahon nain 10.
“Agora defisiente fiziku mai iha nee nain 7, no defisiente neebe mak la hatene koalia nee mos nain 7, nee duni defisiente hamutuk 14, neebe mak tinan ida nee hau ajuda ona sira eskola gratuita iha eskola Nobel da Paz, sira nee balu klase 3 no balu klase 2, nunee mos iha uma mahon nee nain 10 nunee, tanba nee sura hamutuk ho sira nee hamutuk estudantes 24 neebe mak tinan ida nee ami fo gratuita ba sira hodi kontinua sira nian estudu iha eskola Nobel da Paz,” afirma Diretor Eskola Sekundariu Jeral Nobel da Paz, Jeremias P. de Jesus ba STL iha nia knaar fatin, Tersa nee (04/03/2025).
Jeremias dehan, defisiensia nain 14, husi uma mahon ninia nain 10, maibe sira mos ajuda tan labarik nain 3 ou 4 neebe mak sira nian familia laiha kbiit atu fo apoiu sira nian estudu, sira mos fo gratuita hotu.
“Ita nia estudante balu kbiit laek inan aman la mampu mos ita ajuda sira eskola gratuita iha Nobel da Paz, maibe bainhira too iha ezame nasional mak bele hatama osan, maibe ida nee mos ita sei haree, tanba ita ajuda ona sira, sira neebe ami fo eskola gratuita nee nivel sekundariu, no husi uma mahon nee balu sekundariu no balu ensinu baziku,” katak nia.
Nunee mos Rosito Nunes da Costa hanesan estudante dehan, Eskola Nobel da Paz sempre fo eskola gratuita ba maluk sira neebe inan aman laiha kbiit atu haruka oan ba eskola, tanba nee laos foin mak fo apoiu, maibe tinan-tinan sempre ajuda ba maluk sira.
“Hau hanoin Eskola Nobel da Paz sempre fo eskola gratuita ba maluk sira neebe inan aman laiha kbiit atu haruka oan ba eskola,.tanba nee laos foin mak fo apoiu,.maibe tinan-tinan sempre ajuda ba maluk sira,” nia dehan.
(jac)
